"დაგვპირდა და მოგვატყუა, ივანიშვილმა ტექნოლოგიური უნივერსიტეტის მშენებლობისთვის კაპიკი არ გაიღო"

"დაგვპირდა და მოგვატყუა, ივანიშვილმა ტექნოლოგიური უნივერსიტეტის მშენებლობისთვის კაპიკი არ გაიღო" - სააკაშვილი

პოლიტიკა - 19:11, 13 Sep, 2016

6751

საქართველოს მესამე პრეზიდენტმა "რუსთავი 2"- თან ინტერვიუში იმ მიზეზებზე ისაუბრა, თუ რატომ გადაწყვიტა ბიძინა ივანიშვილმა ქუთაისში ტექნოლოგიური უნივერსიტეტის მშენებლობა.

მიხეილ სააკაშვილის განცხადებით, ყოფილი პრემიერი მიხვდა, რომ "იქ კატასტროფულად აგებს".
„ბიძინა ივანიშვილმა გააჩერა ამერიკული მასწავლებლის პროგრამა, მან გააჩერა ამერიკული ტექნოლოგიური უნივერსიტეტი, მან გაუშვა ამერიკული კონსორციუმი აქედან, მან გააჩერა დიზაინის ინსტიტუტის პროგრამა და პრაქტიკულად დაანგრია სამხედრო წარმოება, რომელიც იყო საოცრება, რაც ჩვენ გავაკეთეთ. ეს იყო ერთ-ერთი ყველაზე საინტერესო წარმოება მსოფლიოში. პატარა მასშტაბების, მაგრამ საქართველოს შეეძლო, 700 მილიონი დოლარის წარმოება გაეკეთებინა. ამ კაცს აქვს გამოცდილება ყველაფრის გაჩერების და დანგრევის. დღეს ხვდება, რომ იმერეთში კატასტროფულად აგებენ არჩევნებს, ქუთაისში მძიმე მდგომარეობა აქვს და ფიქრობს, ახლა რითი მოატყუოს ქუთაისელები,“ - განაცხადა მიხეილ სააკაშვილმა.

სააკაშვილმა გაიხსენა, რომ ტექნოლოგიური უნივერსიტეტის შექმნის იდეა, როცა გაუჩნდა, ივანიშვილს დახმარება პირადად სთხოვა, თუმცა ივანიშვილმა მოატყუა.

"ივანიშვილს თხოვნით მივმართე, რომ ტექნოლოგიური უნივერსიტეტის მშენებლობაში დაგვხმარებოდა. ამ კაცმა ორი - სამი წელი გვატყუა და ბოლოს კაპიკი არ გაიღო. მერე კიდევ კარგი ამერიკელები შეგვეხიდნენ ჰილარი კლინტონი ძალიან დაგვეხმარა “- განაცხადა მიხეილ სააკაშვილმა.
საქართველოს მესამე პრეზიდენტმა 2012 წლის არჩევნებზე და მოსახლეობის მაშინდელ განწყობაზეც გაამახვილა ყურადღება და თქვა, რომ ქართველი ხალხი აღარ მოტყუვდება.

„ქართველებმა მიიღეს 2012 წელს ეს გადაწყვეტილება, რადგან უკეთესი ცხოვრება სურდათ და როგორ გინდა, არ დაიჯერო 7 მილიარდის პატრონის დაპირებებს. მე რომ ვყოფილიყავი ჩვეულებრივი მოქალაქე, შეიძლება, მეც დამეჯერებინა, მაგრამ დღეს უკვე 4 წლის ფონზე, როდესაც ის ქართველებს ისევ ეძახის "მოუმწიფარებს", "ჭყინტებს", "ანალიზის არმქონეს" და იძახის, რომ მარტო მან იცის ყველაფერი კარგად, ვფიქრობ, მას თავად სურს დაიჯეროს, რომ ქართველები უინტელექტო ხალხია და მას შეუძლია, ნებისმიერ დროს მათი მოტყუება,“ - განაცხადა მიხეილ სააკაშვილმა.

განათლების მინისტრის ყოფილმა მრჩეველმა ოთარ აბესაძემ განაცხადა, რომ ტექნოლოგიური სამეცნიერო კვლევითი დარგების განვითარების იდეის ავტორი ბიძინა ივანიშვილია.

აბესაძის თქმით, ტექნოლოგიური უნივერსიტეტი 2011 წელს საქართველოს ყოფილ პრეზიდენტს, მიხეილ სააკაშვილს არ გაუხნია . მისი თქმით, მან მხოლოდ შენობა გახსნა.