"როდესაც აღმოჩნდა, რომ მარგველაშვილი არ ყოფილა კარგი კაცი, რესპუბლიკელებს დაგვბრალდა"- უსუფაშვილი

პოლიტიკა - 15:15, 13 Sep, 2016

2479

პარლამენტის თავმჯდომარის დავით უსუფაშვილის განცხადებით, რესპუბლიკური პარტია ყოველთვის ემხრობოდა იმას, რომ პრეზიდენტი არაპირდაპირი წესით ყოფილიყო არჩეული, იგივე პოზიცია ჰქონდათ 2013 წელსაც, თუმცა ამის წინააღმდეგი იყო კოალიცია და თვითონ ბიძინა ივანიშვილიც. აღნიშნული განცხადება დავით უსუფაშვილმა, ბიძინა ივანიშვილის კრიტიკის საპასუხოდ გააკეთა, ივანიშვილმა დავით უსუფაშვილი და რესპუბლიკელები საკონსტიტუციო კომისიის არასათანადო მუშაობაში დაადანაშაულა და განაცხადა, რომ ამ კომისიამ ვერ შეძლო კონსტიტუციაში იმგვარი ცვლილებების შეტანა, რომ საპარლამენტო მოდელის ქვეყანაში, პრეზიდენტიც შესაბამისად არაპირდაპირი წესით ყოფილიყო არჩეული:

„რაც შეეხება პრეზიდენტის არჩევას, პირდაპირს თუ არაპირდაპირს. "რესპუბლიკურ პარტიას" ძალიან მყარი პოზიცია ჰქონდა ჯერ კიდევ 1993-1995 წლების საკონსტიტუციო რეფორმის დროს კომისიაში, რომ პრეზიდენტი ყოფილიყო არაპირდაპირი წესით არჩეული. ჩვენ მაშინაც ვამბობდით, რომ ამ ქვეყანას პირდაპირი წესით არჩეული პრეზიდენტი და ზოგადად, საპრეზიდენტო სისტემა არ წაადგება. ვნახეთ ეს ყველაფერი, არ წაადგა ეს სისტემა. საპარლამენტო მოდელში პრეზიდენტი უნდა იყოს არჩეული არა ხალხის მიერ - პირდაპირ - ეს არის ჩვენი პოზიცია.

უკვე 2013 წელს კი, რესპუბლიკელი ვახტანგ ხმალაძის განცხადებამ, რომლის მიხედვით პარტიის წევრები მხარს უჭერდენენ პრეზიდენტის არაპირდაპირ არჩევნებს, კოალიციაში უკმაყოფილება გამოიწვია. კოალიციაში ატყდა ერთი ამბავი, პირველ რიგში, ბიძინა ივანიშვილის მხრიდან. „თქვენ დასხედით პარლამენტში, ხელში აიღეთ ძალაუფლება და გინდათ პრეზიდენტის დასუსტება და დაიწეყთ რაღაც ამბავიო.“ და ეს ხდებოდა ჯერ მაშინ, როდესაც სააკაშვილი პრეზიდენტია და მარგველაშვილი ჯერ კიდევ კარგი ბიჭია ივანიშვილის თვალში.
აი, მერე უკვე, როდესაც აღმოჩნდა, რომ მარგველაშვილი არ ყოფილა კარგი კაცი, მისი მხარდამჭერების სახით, ახლა რესპუბლიკელებს გვბრალდება ის, რომ მარგველაშვილი პირდაპირ არის არჩეული. და რა უნდა გვექნა რესპუბლიკელებს? ჩვენი ცხრა ხმა ქსეროქსზე უნდა გაგვემრავლებინა 215 გვექცია და კონსტიტუციაში ჩაგვეწერა, რომ პრეზიდენტი სხვანაირად აირჩევა?!“- განაცხადა დავით უსუფაშვილმა.