გიორგი მღებრიშვილმა თბილისში ინტერპოლის კონფერენცია გახსნა

პოლიტიკა - 13:01, 13 Sep, 2016

1065

შინაგან საქმეთა მინისტრმა, გიორგი მღებრიშვილმა, ინტერპოლის გენერალური სამდივნოს პროექტ „მილენიუმის“ კონფერენცია გახსნა.

საქართველოს შს მინისტრმა კონფერენციაზე მოწვეულ 24 ქვეყნის 58 დელეგატს სიტყვით მიმართა და უწყების მიერ საერთაშორისო საპოლიციო თანამშრომლობის კუთხით მიღწეული შედეგები და განხორციელებული პროექტები გააცნო. როგორც გიორგი მღებრიშვილმა აღნიშნა: „ჩვენს ქვეყანას ამ პროექტის არსებობაში დიდი წვლილი მიუძღვის, გამომდინარე იქიდან, რომ საქართველოს სამართალდამცავ ორგანოებს ორგანიზებულ დანაშაულთან ბრძოლის კუთხით დიდი გამოცდილება გააჩნიათ. დღევანდელი სამუშაო ჯგუფის შეკრების მიზანია, როგორც ტრანსნაციონალურ, ევრაზიულ, ორგანიზებულ დანაშაულებრივ ჯგუფებთან ბრძოლის კუთხით გამოცდილების გაზიარება, აგრეთვე, ინსტიტუციონალური და ამასთან, უფრო მჭიდრო ურთიერთობების ჩამოყალიბება. იმედი მაქვს, რომ ყველა ქვეყნის სამართალდამცავი ორგანოების ერთობლივი ძალისხმევით დაძლეული იქნება ის გამოწვევები, რომლის წინაშეც დგას დღევანდელი მსოფლიო და ეს შეხვედრაც საერთაშორისო კრიმინალთან ბრძოლის საქმეში თავის წვლილს შეიტანს“.

„მილენიუმი“ საერთაშორისო ორგანიზებული დანაშაულის შესახებ ინტერპოლის გენერალური სამდივნოს და წევრი ქვეყნების ერთობლივ პროექტს წარმოადგენს, რომელიც „დიდი რვიანის“ (G8) სამართალდამცავთა ჯგუფის მიერ არის შემუშავებული. პროექტი განსაკუთრებულ ყურადღებას ტრანსნაციონალურ, ევრაზიულ, ორგანიზებულ დანაშაულს (TEOC) უთმობს.

2015 წელს, პრაღაში ჩატარებული სამუშაო ჯგუფის ბოლო შეხვედრის ფარგლებში, ინტერპოლის გენერალურმა სამდივნომ გამოიჩინა ინიციატივა, რომ პროექტის წევრი ქვეყნებიდან სამი წამყვანი წევრი შერჩეულიყო. საქართველომ გამოთქვა სურვილი, მონაწილეობა მიეღო ახალ ინიციატივაში და საფრანგეთთან და გერმანიასთან ერთად, პროექტ „მილენიუმის“ წამყვანი წევრი ქვეყანა გახდა.

თბილისში გამართულ ორდღიან კონფერენციაში ინტერპოლის გენერალური სამდივნოს, ევროპოლის და პროექტ „მილენიუმის“ 24 წევრი ქვეყნის (აშშ, დიდი ბრიტანეთი, ლატვია, ფინეთი, გერმანია, შვეიცარია, საქართველო, ბელარუსი, აზერბაიჯანი, ესტონეთი, შვედეთი, ესპანეთი, რუსეთის ფედერაცია, ჩეხეთი ისრაელი, საბერძნეთი, ავსტრია, საფრანგეთი, იტალია, იაპონია, მოლდოვა, კანადა, ბელგია, უკრაინა, არაბთა გაერთიანებული საამიროები) 58 დელეგატი, ასევე, საფრანგეთის, ავსტრიის, ისრაელის და საბერძნეთის პოლიციის ატაშეები მონაწილეობენ.

კონფერენციის ფარგლებში ასევე გაიმართება სამუშაო ჯგუფის შეხვედრები, სადაც დელეგატები საქართველოს სამართალდამცავი ორგანოების მიერ ე.წ. „კანონიერი ქურდებისა“ და ორგანიზებული დანაშაულის წინააღმდეგ ბრძოლაში მიღწეულ წარმატებებს გაეცნობიან.