,,სირცხვილია, ბატონო ბიძინა!“ - უსუფაშვილი ივანიშვილს უავტორიტეტო ლიდერს უწოდებს

პოლიტიკა - 12:32, 13 Sep, 2016

1592

საქართველოს პარლამენტის თავმჯდომარის დავით უსუფაშვილის განცხადებით, ბიძინა ივანიშვილის მხრიდან მისი და რესპუბლიკელების მისამართით გამოთქმული ბრალდებები, პოლიტიკური დებატების ფარგლებს სცდება. უსუფაშვილის თქმით, რესპუბლიკელების დადანაშაულება იმაში, რომ მათ საკონსტიტუციო კომისიაში არასათანადოდ იმუშავეს და პრეზიდენტის არჩევის წესი კონსტიტუციურად მათ გამო ვერ შეიცვალა, ლოგიკას მოკლებულია, რადგან როგორც პარლამენტის თავმჯდომარე აცხადებს ამ კომისიის მუშაობას ხელს უშლიდა ის, რომ ენმ და ოცნება დე ფაქტო ბოიკკოტის რეჟიმში იყვნენ.

„ეს სცდება პოლიტიკური დებატების ფარგლებს. მე შეფასება და სახელის დარქმევა მიჭირს, რა ჰქვია ამას, მაგრამ ჩვენ ვსაუბრობთ საქართველოზე, კონსტიტუციაზე, პოლიტიკურ პროცესზე, ვიღაცა მხარს უჭერდა, ვიღაცა არა, მაგრამ ასეთი მოპყრობა სახელმწიფოს, კონსტიტუციის და სიმართლის მიმართ არის დაუშვებელი. ასე რომ მე ბატონ ბიძინას მივმართავ, ეს არის ჩემი პასუხი იმაზე, რაც შესაძლოა მან კარგად ვერ გაიგო, კარგად ვერ აუხსნეს თუ ვერ მოუთარგმნეს. როდესაც მე ვთქვი, რომ არ ვარ დაინტერესებული ასეთი საკითხების საჯაროდ გამოტანით, იმიტომ რომ ჩვენ ერთად ვიყავით, ერთად ვიღებდით პასუხისმგებლობას, ერთად ვიტანჯებოდით მეც და ბატონი ბიძინაც ამ საკითხებზე. მე ამ არჩევნებზე ძალიან ბევრი სხვა თემით მინდა ვესაუბრო ამომრჩეველს და არა იმით ამ 4-5 წლის განმავლობაში რა ჯოჯოხეთი გავიარეთ“-.

„მეუბნებიან რომ თითი თითზე არ დამიდია, საკონსტიტუციო მუშაობა ჩავაგდე და ასე შემდეგ. სირცხვილია ბატონო ბიძინა, არ შეიძლება. ამის მთქმელს სხვას აღარაფერს დაგიჯერებს ქართველი ხალხი და მე არ მინდა ქართველი ხალხი დარჩეს უავტორიტეტო ლიდერების ანაბარა,“ - განაცხადა უსუფაშვილმა.