თსუ-ის რექტორის არჩევნები - "ზეწოლა აკადემიურ საბჭოზე და ხელისუფლების ინტერესების გამტარი კანდიდატი"

პოლიტიკა - 13:02, 13 Sep, 2016

1739

თბილისის სახელმწიფო უნივერსიტეტის რექტორის არჩევნებს შესაძლოა დიდი ხმაური მოჰყვეს. სტუდენტთა უკმაყოფილების მიზეზი განათლების მინისტრის ყოფილი მოადგილის, გია შარვაშიძის კანდიდატურაა.

თსუ-ს სტუდენტების არგუმენტი ასეთია: "ყოფილი მაღალჩინოსნის, არჩევის შემთხვევაში, უნივერსიტეტი ავტონომიურობას დაკარგავს".

მეტიც, სტუდენტების ინფორმაციით, კანდიდატის მხარდასაჭერად აკადემიური საბჭოს წევრებზე ზეწოლას ახორციელებენ.

"ამ ადამიანის რექტორად დანიშვნა ნიშნავს უნივერსიტეტის ავტონომიაში ჩარევას. განათლების სამინისტრო შეეცდება შეიქმნას უნივერსიტეტში გარკვეული ჯგუფი, რომელიც სამთავრობო ინტერესს გაატარებს. ჩვენ ყველა ერთად დავდგებით, რომ დავიცვათ უნივერსიტეტის ავტონომია"- აღნიშნა სტუდენტური თვითმმართველობის წევრმა შოთა კეჟერაშვილმა.

გია შარვაშიძის კანდიდატურას ეწინააღმდეგება "აუდიტორია 115"-იც. სტუდენტური გაერთიანების წევრები თვლიან, რომ კანდიდატი ხელისუფლების მიერ ლობირებულია.

როგორც "ნიუპოსტს" "აუდიტორია 115"- ის წევრმა ნათია ქარჩილაძემ განუცხადა, მარტის აქციების დროს, სახელმწიფოს სწორედ შარვაშიძე წარმოადგენდა, თუმცა სტუდენტები ამ უკანასკნელმა მოატყუა.

"გია შარვაშიძემ უამრავი დაპირება მოგვცა, მაგალითად თვითმმართველობის გაუქმება, თუმცა არც ერთი მათგანი არ შეასრულა - მოგვატყუა. დღეს კი ასეთი ადამიანი რექტორობაზე იყრის კენჭს. მატყუარა ადამიანი, რომელსაც პოლიტიკური გადაწყვეტილების მიღება არ შეუძლია, უნივერსიტეტის ხელმძღვანელი არ უნდა იყოს"- აღნიშნა სტუდენტმა.

მიუხედავად იმისა რომ "აუდიტორია 115"-ის წევრებისა და სტუდენტური თვითმმართველობის პოზიცია შარვაშიძესთან დაკავშირებით ემთხვევა, ნათია ქარჩილაძე "ნიუპოსტთან" ამბობს, რომ თვითმმართველობის პროტესტი შიშით არის გამოწვეული, რომ უცხო ადამიანის მისვლით თსუ-ს თვითმმართველობის გავლენა შესუსტდება.

"თვითმმართველობას ახალი ადამიანის მისვლა არ აწყობს. გია შარვაშიძის რექტორობის შემთხვევაში მათ არ იციან რა ბედი ელით. მათი სურვილია ამ პოსტზე შიდა კლანის წარმომადგენელი დაინიშნოს, რომელიც სასათბურე პირობებს დაახვედრებს თვითმმართველობას. ჩვენ კი არც შიდა კლანის წარმომადგენელი გვინდა და არც ხელისუფლების ინტერესების გამტარი შარვაშიძე"- თქვა "აუდიტორია 115"-ის წევრმა.

ნათია ქარჩილაძის ინფორმაციით, კანდიდატის მხარდასაჭერად აკადემიური საბჭოს წევრებზე ზეწოლას ახორციელებენ.

"მეც გავიგე ამის შესახებ. თუ აკადემიური საბჭო ქმედითუნარიანია, თუ მას შეუძლია გადაწყვეტილებების დამოუკიდებლად მიღება და უნდა უნივერსიტეტი დამოუკიდებელი იყოს, მაშინ ამ ზეწოლის შესახებ ხმამაღლა უნდა განაცხადოს"- დასძინა თსუ-ს სტუდენტმა.

სტდენტთა პროტესტზე კომენტარი გააკეთა თავად რექტორობის კანდიდატმა გია შარვაშიძე იმედოვნებს, რომ პროცესები გამჭვირვალედ წარიმართება.

"მაქვს იმედი, რომ ყველა კანდიდატი თანაბარ პირობებში იქნება, ყოველგვარი ზეწოლის გარეშე. თუ ზეწოლის ფაქტები არსებობს, ის საჯარო უნდა გახდეს და შესაბამისმა ორგანოებმა უნდა მიიღონ ყველა ზომა, რომ არც ერთი მხრიდან მსგავს ფაქტს ადგილი არ ჰქონდეს"- აღნიშნა შარვაშიძემ.

ცნობისთვის, განათლებისა და მეცნიერების მინისტრის მოადგილე გიორგი შარვაშიძე საქართველოს პრემიერ-მინისტრის გიორგი კვირიკაშვილის ბრძანებით, თანამდებობიდან გუშინ გათავისუფლდა.

სახელმწიფო უნივერსიტეტის რექტორობის კანდიდატთა განცხადების მიღების ვადა ხვალ იწურება. არჩევნები 23 სექტემბერს გაიმართება.