ექსპერტი გია ხუხაშვილი ტელეკომპანია GDS - ის ახალ სატელევიზიო პროექტს, ბიძინა ივანიშვილი რეგიონალურ მედიასთან შეხვედრებს აკრიტიკებს.

როგორც "ნიუოპოსტს" ხუხაშვილმა განუცხადა, ივანიშვილის პერმანენტული კრიტიკა ხშირ შემთხვევაში უფასო რეკლამას უკეთებს ისეთ პარტიებს, რომლებსაც პულსი არ ესინჯებათ.

ამასთან, ექსპერტის აზრით, ყოფილი პრემიერის მიერ ამომრჩეველთან მსგავსი ფორმატით კომუნიკაცია აზიანებს ივანიშვილის იმიჯს და მმართველს პოლიტიკურ პარტიას.

"ეს პროექტი, მისი ფორმატი არ მომწონს, არაბუნებრივი პროექტია. პრესკონფერენციების ჩატარებას რეგიონებში სიარული არ სჭირდება. თუ მოსახლეობასთან კომუნიკაცია მხოლოდ ტელეეთერით გაქვს, ვსვამ მარტივ კითხვას - რატომ დადიხართ რეგიონებში?! როცა იგივე შედეგი ერთი ეთერიდან შეგიძლია მიიღო - რა აზრი აქვს ამ ვოიაჟებს ვერ გავიგე.

გარდა ამისა პერმანენტულად ერთი და იგივე თემაზე საუბარი პოლიტექნიკურად გაუმართლებელია. მსგავსი პრეცენდენტის არ შემიძლია გავიხსენო.

რაც შეეხება შინაარსს, მისი მთავარი ძალა არის იმაში, რომ მისგან ადამიანები პოზიტივს ელოდებიან, მაგრამ ამ შეხვედრებზე პოზიტივის გარდა ყველაფერზეა საუბარი. შეხვედრები სამწუხაროდ მხოლოდ ნეგატივს ეძღვნება, რაც ჩემი აზრით, ამ პარტიებს ვერაფერს აკლებს, პირიქით რეკლამას უკეთებს - მარტივად რომ ვთქვათ ფასი ედებათ ისეთ პოლიტიკურ პარტიებს, რომლებსაც ადრე პულსი არ ესინჯებოდათ. გარდა ამისა მსგავსი გამოსვლები პირადად ივანიშვილს აკნინებს, მისი სიტყვის წონა უფასურდება. ასე რომ, როგორც ივანიშვილისთვის ასევე "ქართული ოცნებისთვის" გადაცემების ეს ციკლი ნეგატიური შედეგის მომტანია"- აღნიშნა გია ხუხაშვილმა.