საქართველოს ოპოზიური პარტიების წარმომადგენლები ვენეციის კომისიის ვიცე-პრეზიდენტის ჰერდის თორგეირსდოტირის განცხადებას ეხმაურებიან.

ნაციონალური მოძრაობის წევრის გიორგი კანდელაკის განცხადებით, დღესდღეობით საკონსტიტუციო სასამართლო ვეღარ ფუნქციონირებს.

„იმისთვის, რომ საკონსტიტუციო სასამართლომ და სხვა ინსტიტუტებმაც იფუნქციონირონ ნორმალურად, აუცილებელია ივანიშვილის ჩამოშორება,“- განაცხადა გიორგი კანდელაკმა.

განცხადებას გამოეხმაურა თავისუფალი დემოკრატების წევრი ნინო გოგუაძე, რომელმაც აღნიშნა, რომ საკონსტიტუციო სასამართლოზე ზეწოლის ფაქტი არის ქვეყნის იმიჯის ხელყოფა.

რესპუბლიკური პარტიის ერთ-ერთი ლიდერის, ლევან ბერძენიშვილის თქმით, ზეწოლა საკონსტიტუციო სასამართლოზე როგორც ხელისუფლების მხრიდან, ისე შიგნიდანაც იყო და კარგია, რომ ვენეციის კომისიამ ეს ფაქტი აღნიშნა.

“ფაქტია, რომ ხელისუფლების მხრიდანაც არის ზეწოლა, ფაქტია ეს შეუიარაღებელი თვალითაც კარგად ჩანს ბოლო დღეებში რაც ხდება, როცა პლენუმი ვერ იკრიბება, ხალხი ძაღლებს ასეირნებს და ა.შ. ეს სრულიად ნათელია საიდანაც უბერავს ქარი, მაგრამ ამავე დროს რაც მართალი მართალია, იყო შიდა განცხადებებიც,”-აცხადებს ლევან ბერძენიშვილი.