საკონსტიტუციო სასამართლოს დაარსებიდან 20 წლისთავის აღნიშვნასთან დაკავშირებით კონფერენცია იმართება

პოლიტიკა - 12:04, 10 Sep, 2016

1410

საქართველოს საკონსტიტუციო სასამართლო დაარსებიდან 20 წლისთავის აღსანიშნავ საიუბილეო თარიღთან დაკავშირებით 9-11 სექტემბერს მართავს საერთაშორისო კონფერენციას თემაზე „კონსტიტუციური მართლმსაჯულება გარდამავალ დემოკრატიაში: კონსტიტუციური კონტროლის მიღწევები და გამოწვევები საქართველოსა და აღმოსავლეთ ევროპაში“.

კონფერენცია გახსნა საქართველოს საკონსტიტუციო სასამართლოს თავმჯდომარე გიორგი პაპუაშვილმა, საქართველოს პრეზიდენტმა გიორგი მარგველაშვილმა,

ვენეციის კომისიის ვიცე-პრეზიდენტმა ჰერდის თორგეირსდოტირმა და სხვა საერთაშორისო ორგანიზაციების ხელმძღვანელმა პირებმა.

საკონსტიტუციო სასამართლოს მიერ ორგანიზებულ კონფერენციას ესწრებიან ადამიანის უფლებათა ევროპული სასამართლოს ვიცე-პრეზიდენტი, ევროსაბჭოს ვენეციის კომისიის, საქართველოსა და ევროპის საკონსტიტუციო სასამართლოების თავმჯდომარეები და წევრები, საქართველოს პარლამენტის, დიპლომატიური კორპუსის, აკადემიისა და საერთაშორისო ორგანიზაციების წარმომადგენლები.

კონფერენცია იმართება ევროკავშირის პროექტის „საკონსტიტუციო სასამართლოს მხარდაჭერის“, გერმანიის საერთაშორისო თანამშრომლობის ორგანიზაციისა (GIZ) და ევროპის საბჭოს ვენეციის კომისიის მხარდაჭერით.

კონფერენცია ბათუმში, სასტუმრო „რადისონში“ იმართება. კონფერენციის მუშაობა წარიმართება ქართულ, ინგლისურ და რუსულ ენებზე.