ჩემს გადაწყვეტილებას პრემიერი გაგებით მოეკიდა - რატომ აღარ არის სოფო ჯაფარიძე „ოცნების“ საარჩევნო სიაში?!

პოლიტიკა - 14:59, 09 Sep, 2016

7299

„ქართული ოცნების“ საარჩევნო სია ცნობილია, თუმცა, ამ სიაში აღარ ფიქსირდება სოფო ჯაფარიძე, რომელიც ფაქტს სოციალურ ქსელში ეხმაურება და აღნიშნულის შესახებ განცხადებას აკეთებს.

ჯაფარიძის განცხადებით, იგი საარჩევნო სიაში პირადი მიზეზის გამო არ არის და ეს გადაწყვეტილება მან თავად მიიღო:

„ბუნებრივია გაგიჩნდათ კითხვები მას შემდეგ, რაც "ქართული ოცნების" საარჩევნო სიაში ვერ მნახეთ. სუბიექტური,მიზეზის გამო, რომელიც იმდენად პირადია, რომ ამაზე საუბარი არ მსურს, მივიღე გადაწყვეტილება, რომელსაც აბსოლუტურად გაგებით მოეკიდა პრემიერ-მინისტრი. (საჯაროდ ვუხდი მას მადლობას ნდობისთვის, თანადგომისათვის და მხარდაჭერისათვის). ასევე მადლობელი ვიქნები ჟურნალისტების, რომლებიც გაგებით მოეკიდებიან ჩემს გადაწყვეტილებას და ზედმეტი კითხვებით არ მომმართავენ. ეს ის შემთხვევაა, როდესაც ჩემს გადაწყვეტილებას პოლიტიკური სარჩული არ ედო და მხოლოდ პირადმა, სუბიექტურმა მიზეზმა განაპირობა ჩემი გადაწყვეტილება. სადაც არ უნდა ვიყო, რა პოზიციაზეც, მე გავაგრძელებ საქმიანობას ჩვენი ქვეყნის სასიკეთოდ (მთელი ჩემი შეგნებული ცხოვრება ასე ვიყავი და ვიქნები) . წარმატებას ვუსურვებ ქართულ ოცნებას საპარლამენტო არჩევნებში“, წერს სოფო ჯაფარიძე სოციალურ ქსელში.

ცნობისათვის, სოფო ჯაფარიძე პრემიერ-მინისტრის თანაშემწეა ადამიანის უფლებათა და გენდერული თანასწორობის საკითხებში.

სოფო ჯაფარიძე ფლობს მაგისტრის ხარისხს ადამიანის უფლებათა საერთაშორისო სამართალში, არის ესექსის უნივერსიტეტის კურსდამთავრებული და ევროკავშირის მიერ დაფინანსებული პროექტების სამართლებრივი ექსპერტი.