IPRM-ის შეხვედრა გალში- მთავარი თემა გიგა ოთხოზორიას მკვლელობაში ბრალდებულის საკითხი იქნება

პოლიტიკა - 10:35, 09 Sep, 2016

1836

დღეს გალში ინციდენტების პრევენციისა და მათზე რეაგირების მექანიზმის (IPRM) ფარგლებში, მორიგი შეხვედრა გაიმართება. შეხვედრაზე ქართული მხარე კიდევ ერთხელ დააყენებს გიგა ოთხოზორიას მკვლელობაში ბრალდებულის საკითხს, რადგან ამ ეტაპზე რეალური შედეგი ისევ არ არის მიღწეული და საოკუპაციო რეჟიმი საქართველოს ხელისუფლებისგან დამატებით მასალებს ითხოვს. ქართული მხარე, შეხვედრაზე ასევე კვლავ დააყენებს უკანონო პატიმრობაში მყოფი გიორგი ლუკავას გათავისუფლების საკითხსაც.

შერიგებისა და სამოქალაქო თანასწორობის საკითხებში სახელმწიფო მინისტრის ქეთევან ციხელაშვილის თქმით ქართული მხარე ოთხოზორიას მკვლელობაში ბრალდებულის შესაბამისად პასუხისგების საკითხის დაყენებას გეგმავს:

„ლუკავა ისევ რჩება სოხუმის იზოლატორში და მისი გათავისუფლების საკითხი კიდევ ერთხელ იქნება დასმული IPRM-ის ფორმატში. ერთ-ერთი მთავარი საკითხი ამ შეხვედრაზე იქნება გიგა ოთხოზორიას მკვლელობის საკითხი, კერძოდ დამნაშავის შესაბამისად პასუხისგების საკითხი, არსებობს ბევრი კითხვის ნიშანი იმასთან დაკავშირებით თუ რა ხდება და როგორ მიდის ეს პროცესი.“- განაცხადა ქეთევან ციხელაშვილმა.