"ახლა ველოდები ჩემი ძმის მკვლელობის საქმის ახლიდან წარმოჩენას..."- კალაძე ბრალდებებს პასუხობს

პოლიტიკა - 15:33, 07 Sep, 2016

16022

იარაღის უკანონო ტარებისთვის დაკავებული გიორგი ფეიქრიშვილისა და ნოდარ ნიშნიანიძის ოჯახების მხრიდან წამოსულ ბრალდებებს, ვიცე პრემიერმა კახა კალაძემ უპასუხა. კალაძის თქმით, მის წინააღმდეგ გაჟღერებული ბრალდებები ცილისწამებაა და თუ დაკავებულების ახლობლებს მტკიცებულებები გააჩნიათ იმიასა, რომ ამ დაკავებების უკან კახა კალაძე დგას, მათ გამოძიებას უნდა მიმართონ.

„გულდასაწყვეტია რომ ამდენი ცილისწამება ისმის, თუმცა მე მესმის, რომ წინასაარჩევნო პერიოდში ვიმყოფებით. როდესაც არჩევნები ახლოვდება ხან „მარშუტკების“ ბიზნესის წართმევას მაბრალებენ, ხან ხუდონი თითქოს ჩემი საკუთარი პროექტია, ახლა ბოლოს გავიგე რომ ქარის ელექტროსადგურებიც ჩემი საკუთრებაა და მზის სადგურებიც, რომლის გაკეთებაც იგეგმება. ხშირია მსგავსი ათასი სიბინძურეები. ახლა ველოდები ჩემი ძმის მკვლელობის საქმის ახლიდან წარმოჩენას საზოგადოებისთვის და შეიძლება კენედის მკვლელობაც თავიდან განიხილონ და ესეც მე დამაბრალონ. მე ამ ოჯახებს ადამიანურად თანავუგრძნობ და თუ მათ რაიმე მტკიცებულება გააჩნიათ, წარუდგინონ შესაბამის სამსახურებს, იმიტომ რომ ყველა დაიღალა ამ ცილისწამებებით. თუ ფიქრობენ, რომ ამით მე მორალურად დამანგრევენ ეს არ გამოუვათ, რადგან მე ძალიან ბევრი ტკივილი მაქვს გამოვლილი და მსგავსი ცილისწამებები ხელს ვერ შეუშლის იმ საქმიანობას, რომელსაც მე ჩემი ქვეყნისთვის ვაკეთებ“- განაცხადა კახა კალაძემ.

შეგახსენებთ, დაკავებული გიორგი ფეიქრიშვილისა და ნოდარ ნიშნიანიძის ოჯახის წევრები აცხადებენ, რომ ახალგაზრდების დაკავების უკან საქართველოს ვიცე-პრემიერი კახა კალაძე დგას.

კახა კალაძე თბილისში მომხდარ სისხლიან გარჩევებთან დაკავშირებით მისი გვარის გაჟღერებასაც გამოეხმაურა და აღნიშნა, რომ მისი ოპონენტების მხრიდან მსგავსი ბრალდებები გასაკვირი არაა, რადგან ეს არაერთხელ მომხდარა:

"საარჩევნო პერიოდია და ნორმალურია რომ საარჩევნო შტაბის ხელმძღვანელ კახა კალაძეზე შეტევები ხორციელდება. ეს ქართულ პოლიტიკაში სიახლე არაა თქვენ გახსოვთ წინა არჩევნებიც."- განაცხადა კალაძემ.