იარაღისა უკანონო შენახვისთვის დაკავებული გიორგი ფეიქრიშვილისა და ნოდარ ნიშნიანიძის ახლობლები სამართალდამცველების მხრიდან უკანონო ქმედებაზე საუბრობენ და სასამართლოსგან სამართლიან განაჩენს ითხოვენ.

გიორგი ფეიქრიშვილის დედამ რუსთავი2-თან საუბარში სკანდალური ინფორმაცია გაასაჯაროვა, ნინო ფეიქრიშვილის თქმით, გუშინ მათთან სახლში „ქართული ოცნების“ მაჟორიტარობის კანდიდატის დავით ჭიჭინაძის წარმომადგენელი იმყოფებოდა, რომელმაც არჩევნებში დახმარებისა და მხარდაჭერის სანაცვლოდ, დახმარება და გიორგი ფეიქრიშვილის ძმის დავით ფეიქრიშვილის გათავისუფლება შესთავაზა.

აღნიშნულს დავით ჭიჭინაძე სოციალური ქსელის მეშვეობით ეხმაურება:

„დღეს ჩემთვის ცნობილი გახდა ამ დღეებში დაკავებული გიორგი ფეიქრიშვილის დედის, ნინო ფეიქრიშვილის ბრალდების შესახებ, თითქოს ჩემი წარმომადგენელი იმყოფებოდა მათთან სახლში და არჩევნებში მხარდაჭერის სანაცვლოდ დახმარება, ანუ მისი შვილის გათვისუფლება შესთვაზა. სრული პასუხისმგებლობით ვაცხადებ: გავრცელებული ინფორმაცია არ შეესაბამება სინამდვილეს. ჩემთვის გიორგი ფეიქრიშვილის დაკავებისა და მისი ოჯახის შესახებ მხოლოდ ის არის ცნობილი, რაც ამ დღეებში მედიის საშუალებით ვრცელდება. წარმოდგენა არ მაქვს არც მათი მისამართის, არც კავშირების და არც იმის შესახებ თუ როგორ შეიძლება „დამეხმარონ არჩევნებში“. მესმის ოჯახის მძიმე მდგომარეობა და არ გამოვრიცხავ, რომ ვიღაც შეიძლება მართლაც ცდილობდეს მათ შეცდომაში შეყვანას. ამიტომ ჩემთვის მნიშვნელოვანია, ქალბატონმა ნინომ უფრო მეტი ინფორმაცია მიაწოდოს საზოგადოებას და პირადად მე იმ პირის შესახებ, რომელიც თითქოსდა „ჩემი წარმომადგენელი“ იყო. პირადად ვარ დაინტერესებული გავარკვიო სიმართლე და გავიგო, ვინ ცდილობს ოჯახის შეცდომაში შეყვანას. მზად ვარ ნებისმიერ დროს შევხვდე ქალბატონ ნინოს და მასთან ერთად გავარკიო ეს გაუგებრობა. მესმის რომ გიორგი ფეიქრიშვილის ოჯახი დღეს მძიმე მდგომარეობაშია. ვუსურვებ მათ სამართლიან გამოძიებას და სამართლიან სასამართლოს“, - წერს ჭიჭინაძე.