საქართველოს პრემიერ-მინისტრი გიორგი კვირიკაშვილი ტელეკომპანია რუსთავი 2-ის ირგვლივ მიმდინარე მოვლენებზე საუბრობს. პრემიერის განცხადებით, რუსთავი 2-ის საქმეს ორი განზომილება აქვს. პირველი მის მფლობელობას უკავშირდება, მეორე კი მედია თავისუფლება გახლავთ.

გიორგი კვირიკაშვილი აცხადებს, რომ ტელეკომპანიის მფლობელების საქმეში მთავრობა არ ერევა. მისივე თქმით, ხელისუფლება დაინტერესებულია, რომ სამაუწყებლო კომპანია უცვლელი დარჩეს.

“რუსთავი 2-ის საქმეს აქვს ორი განზომილება - პირველი მის მფლობელობას უკავშირდება. ჩვენ ვერც ჩავერევით და არც ვაპირებთ ჩავერიოთ სასამართლოს საქმეში. არსებობს მეორე მიმართულებაც, მედიის თავისუფლება. ჩემი პრემიერობის პერიოდში და წინა პოსტზე ყოფნის დროსაც, ათობით განცხადება გავაკეთე რუსთავი 2-ის მხარდასაჭერად. შევთავაზე სხვადასხვა ინსტრუმენტი - შექმნილიყო მედია ბორდი, რომელიც სამოქალაქო საზოგადოების ლიდერების, არასამთავრობოებისა და მედია სპეციალისტებით იქნებოდა დაკომპლექტებული, რომ უზრუნველყოფილი ყოფილიყო მისი სარედაქციო პოლიტიკა და არა ობიექტურობა. ეს არ არის ჩვენი მიზანი. ამის საუკეთესო მაგალითი საზოგადოებრივი მაუწყებელია, რომელიც უფრო კრიტიკულია ზოგჯერ ვიდრე რუსთავი 2.

მერწმუნეთ თუ ვინმეა დაინტერესებული იმაში, რომ ეს ტელეარხი უცვლელი დარჩეს, მთავრობაა. ეს არის ზოგიერთი პოლიტიკოსის მიერ ატეხილი ხმაური. შესაძლოა, მათ უნდათ აჩვენონ რამდენად მნიშვნელოვნები არიან, მაგრამ ჩვენთვის ყველაზე მნიშვნელოვანი არის ის, რაც უკვე გვაქვს,"- განაცხადა კვირიკაშვილმა.