საქართველოს პარლამენტის თავმჯდომარე, „რესპუბლიკური პარტიის“ ლიდერი დავით უსუფაშვილი აცხადებს, რომ "ვარდების რევოლუციის" მონაპოვარი შეეწირა არასწორ მიმართულებას. უსუფაშვილის განმარტებით, საქართველოში ევროატლანტიკური საბჭოს სხომის ჩატარება მნიშვნელოვანია და იგი ღონისძიებაზე სიტყვით გამოსვლას გეგმავს:

„სხდომაზე ვისაუბრებთ შავი ზღვის უსაფრთხოების კონცეფციაზე, იმ ყველაფერზე, რასაც საქართველომ მiაღწია ნატო-სთან ინტეგრაციით, რაც უნდა გამოვიყენოთ ძალიან ეფექტურად ჩვენი ქვეყნის დასაცავად. დღევანდელ კონფერენციაზე ვსაუბრობდით დემოკრატიზაციის პროცესის შუქ-ჩრდილებზე საქართველოში. მე აღვნიშნე, რომ საქართველო ჩანს ძალიან წარმატებულ ქვეყნად. როდესაც მას უყურებ ევროპიდან და ჩვენს ზურგს უკან არის რუსეთი, ცენტრალური აზია, სხვა ქვეყნები, მაგრამ ჩვენ გვაქვს გაცილებით მეტი გასაკეთებელი, თუ ჩვენსავე თავს შევხედავთ აღმოსავლეთიდან და ჩვენს უკან დავინახავთ ევროპას და განვითარებულ მსოფლიოს. დემოკრატიზაციის პროცესის შეჩერება არ არის სწორი არც ერთი არგუმენტით. 90-იანი წლების დასაწყისში იყო დებატები, ჯერ დამოუკიდებლობა, თუ ჯერ დემოკრატია, ამ დებატებმა ძალიან ცუდ შედეგებამდე მიგვიყანა, სამოქალაქო ომამდე. მერე იყო სხვა ტიპის დებატები, მოდერნიზაცია, თუ დემოკრატია, "ვარდების რევოლუციის" მონაპოვარი შეეწირა ამ არასწორ მიმართულებას, რომ მოდი ჯერ ქვეყანა სხვანაირად განვავითაროთ, დემოკრატიული ინსტიტუტები და პროცესები მოიცდის“, - განაცხადა უსუფაშვილმა.

მისივე თქმით, ქვეყანაში დემოკრატიზაციის შეჩერება არ უნდა მოხდეს.

„ეკონომიკა გვაქვს ასაღორძინებელი ან სხვა რამ გვჭირდება. მრავალპარტიულ, თავისუფალ პოლიტიკურ პროცესს არ აქვს ალტერნატივა ჩვენი ქვეყნის უსაფრთხოებისთვის, ჩვენი ხალხის კეთილდღეობისთვის.

დემოკრატიას საფრთხე დაემუქრება, თუ საქართველოში არ გვექნება ის ვითარება, როდესაც ხელისუფლების სათავეში არიან პოლიტიკური გუნდები. თუ ჩვენ მივალთ იქამდე, რომ ხელისუფლებაში არიან მონდომებული, გულანთებული ადამიანები, მაგრამ არა პოლიტიკური გუნდები პოლიტიკური მსოფლმხედველობით და იდეებით, მაშინ ჩვენ გვექნება ეს საფრთხე“, - აღნიშნა უსუფაშვილმა.