რა პროცედურები რჩება ვიზალიბერალიზაციამდე

პოლიტიკა - 13:15, 06 Sep, 2016

2053

საქართველოს, ვიზალიბერალიზაციის პროცედურების დასასრულებლად, ევროპარლამენტის სამოქალაქო თავისუფლებათა, მართლმსაჯულებისა და შინაგან საქმეთა კომიტეტმა საქართველოს შესახებ მომხსენებელს მანდატი მისცა, რათა დაიწყოს სამმხრივი, შიდა ინსტიტუციონალური მოლაპარაკება და საკითხი გავიდეს პლენარულ სხდომაზე.
პლენარულ სხდომაზე ევროპარლამენტი კენჭს უყრის ცვლილებას და გადაწყვეტილებას იღებს ხმათა უბრალო უმრავლესობით, საჭიროა სულ მცირე 376 მომხრე პარლამენტის 751 წევრიდან. ამით პარლამენტი აღნიშნულზე მუშაობას ასრულებს და საკითხი ევროკავშირის საბჭოში გადადის. მინისტრთა საბჭო, რომელშიც შედიან ევროკავშირის წევრი ქვეყნების შინაგან საქმეთა და იუსტიციის მინისტრები (მხოლოდ შენგენის ზონაში შემავალი ქვეყნების), კენჭს უყრიან ევროკომისიის წინადადებას. ოფიციალურად გადაწყვეტილების მისაღებად საჭიროა 228 ხმა 309 ხმიდან. როცა გადაწყვეტილებას ისიც მიიღებს, თავმჯდომარე, ქვეყნის პრემიერი და პარლამენტის თავმჯდომარე ერთობლივად მოაწერენ ხელს. იგი ევროკავშირის ოფიციალურ ჟურნალში გამოქვეყნდება და გამოქვეყნებიდან 3 კვირაში ძალაში შევა.

ზემოთჩამოთვლილი ეტაპების დასრულების შემდეგ ბიომეტრიული პასპორტის მქონე საქართველოს მოქალაქეები ვიზის გარეშე მოგზაურობას შეძლებენ შენგენის ზონის ტერიტორიაზე, რომელიც მოიცავს ევროკავშირის 22 წევრ ქვეყანას, ევროკავშირის 4 არაწევრ ქვეყანას და შენგენის 4 კანდიდატ ქვეყანას:

წევრი ქვეყნები: ავსტრია, ბელგია, გერმანია, დანია, ესპანეთი, ესტონეთი, იტალია, ლატვია, ლიტვა, ლუქსემბურგი, მალტა, ნიდერლანდები, პოლონეთი, პორტუგალია, საბერძნეთი, საფრანგეთი, სლოვენია, სლოვაკეთი, უნგრეთი, ფინეთი, შვედეთი, ჩეხეთი.

არაწევრი ქვეყნები: ისლანდია, ლიხტენშტეინი, ნორვეგია და შვეიცარია;

კანდიდატი ქვეყნები: ბულგარეთი, კვიპროსი, რუმინეთი, ხორვატია;