ახალი სტანდარტი უნდა ვაჩვენოთ, არჩევანი უნდა გავაკეთოთ არა ვიღაცის წინააღმდეგ, არამედ ვიღაცის ასარჩევად

ახალი სტანდარტი უნდა ვაჩვენოთ, არჩევანი უნდა გავაკეთოთ არა ვიღაცის წინააღმდეგ, არამედ ვიღაცის ასარჩევად - მარგველაშვილი

პოლიტიკა - 12:01, 06 Sep, 2016

1241

საქართველოს პრეზიდენტის განცხადებით, 2016 წლის საპარლამენტო არჩევნებში ქვეყანამ ახალი სტანდარტი უნდა აჩვენოს, რაც გულისხმობს იმას, რომ არჩევანის გაკეთება არა ვიღაცის წინააღმდეგ, არამედ ვიღაცის ასარჩევად მოხდება. აღნიშნულ თემაზე გიორგი მარგველაშვილმა საერთაშორისო კონფერენციაზე „ევროპის ცვალებადი გეოსტრატეგიული ლანდშაფტი ვარშავის სამიტის შემდეგ“ ჟურნალისტებთან ისაუბრა. პრეზიდენტის თქმით, 2012 წლის არჩევნები ძალიან მნიშვნელოვანი იყო საქართველოსთვის, მომავალი არჩევნებით კი ქვეყანა ევროპულ პოლიტიკურ ლანდშაფტზე უნდა გადავიდეს:

„ეს იყო ის მომენტი, რომელმაც აჩვენა, რომ მთავრობა შეიცვალა ინდივიდუალური ადამიანების მიერ ხმის მიცემით. ეს იყო მშვენიერი გამოცდილება და ამავდროულად ეს არჩევნები ძალიან მნიშვნელოვანია. არჩევნები უნდა გაიმართოს ევროპული სტანდარტების შესაბამისად. მოვუწოდებ დამკვირვებლებს, რომ ჩაერთონ დიდი ყურადღებით ამ პროცესში. ჩვენ ეს დაგვეხმარება როგორც ქვეყანას, რომ ჩავატაროთ დემოკრატიული არჩევნები. საპარლამენტო არჩევნებით ჩვენ უნდა დავადგინოთ საარჩევნო კამპანიის ახალი სტანდარტი, პოლიტიკური ცხოვრების ახალი სტანდარტი. ახლა ჩვენ უნდა ვაჩვენოთ ახალი სტანდარტი, სადაც ჩვენ არჩევანს გავაკეთებთ არა ვიღაცის წინააღმდეგ, არამედ ვიღაცისთვის, ვიღაცის ასარჩევად. ეს არ არის მარტივი, როგორც ამომრჩევლების, ისე პოლიტიკოსების კონტექსტში, რადგანაც ამომრჩევლები მიჩვეულები არიან ისეთ საარჩევნო კამპანიას, სადაც ჩვენ ვსაუბრობთ სამყაროს აღსასრულზე. მაგალითად, თუ ესა თუ ის ძალა მთავრობაში არ იქნება, ეს იქნება სამყაროს აღსასრული. სწორედ ამას ისმენდნენ ჩვენი ამომრჩევლები. ამგვარი გარემო ახლა უკვე არ არსებობს და არ არის ასეთი ტრაგიკული არჩევნის წინაპირობა. ასევე პოლიტიკოსები მიჩვეულები იყვნენ ამგვარ რიტორიკას. ისინი საუბრობდნენ შავთეთრ ფერებში“- განაცხადა გიორგი მარგველაშვილმა.