თავდასხმა გორის მაჟორიტარი დეპუტატობის კანდიდატის შვილზე

შემთხვევა - 18:09, 05 Sep, 2016

6224

,,ნიუპოსტის“ კორესპონდენტის ცნობით, მედეა აბაშიძის ვაჟს დღეს ფიზიკურად სოფელ ქიწნისში გაუსწორდნენ. პაატა ბურჭულაძე სახელმწიფო ხალხისთვის გორის ოფისში, მომხდარს პოლიტიკური ანგარიშწორება უწოდეს და ჟურნალისტებს ინციდენტის ამსახველი ვიდეო მასალა გადასცეს. მედეა აბაშიძის განცხადებით, „ქართული ოცნები“ მაჟორიტარობის კანდიდატის, თეიმურაზ ხუბულურის დავალებით მის შვილს „ნაციონალური მოძრაობის“ ყოფილი ზონდერ ბრიგადის ხელმძღვანელმა ვინმე ბიბილაშვილმა ფიზიკური შეურაცხყოფა იმ დროს მიაყენა, როდესაც ის და პარტიის სხვა ლიდერები ქიწნისში ამომრჩეველს ხვდებოდნენ, იმავე სოფელში ამომრჩეველტან შეხვედრას „ქართული ოცნები“ მაჟორიტარობის კანდიდატი, თეიმურაზ ხუბულურიც მართავდა. მედეა აბაშიძე ამბობს, რომ ინციდენტის ამსახველი ვიდეო მასალა, საერთაშორისო ორგანიზაციებს უკვე გადაუგზავნეს.

„დღეს განმეორდა კორცხელის თემა გორის რაიონში, სოფელ ქიწნისში. მე მოვუწოდებ ჩვენი ქვეყნის ხელისუფლებას, მოვუწოდებ მაჟორიტარობის კანდიდატ, ბატონ თეიმურაზ ხუბულურს, პოლიტიკა არ გახლავთ ტატამი. დღეს მოხდა ფიზიკური ანგარიშწორება ჩვენი პარტიის წევრზე, ჩემს შვილზე, მათ რომ იცოდნენ ჩემი შვილი იყო სწორედ ეს მოტივაცია გამოიყენეს, მაგრამ მე მას დავუმტკიცებ, რომ ის არის პოლიტიკური არარაობა, სადაც უნდა რომელ ეთერშიც უნდა დავუჯდები, მას ვიღაცამ აუცილებლად უნდა უთხრას, რომ მისი ადგილი არა თუ ქართულ პოლიტიკაში, არამედ გორის რაიონში არ არის“-აცხადებს მედეა აბაშიზე.

როგორც „ნიუპოსტს“ შინაგან საქმეთა სამინისტროში განუცხადეს, მომხდარზე მოკვლევა უკვე დაიწყო. პაატა ბურჭულაძის პარტიაში გაჟღერებულ ბრალდებებზე, „ქართული ოცნების“ რაიონულ ორგანიზაციაში განცხადება ამ დრომდე არ გაკეთებულა.