"ივანიშვილი არის წარსული, ის ისევ რჩება ენის მიტან-მოტანის და ჭორაობის დონეზე"- ალასანია

პოლიტიკა - 15:31, 05 Sep, 2016

4308

ირაკლი ალასანიამ ყოფილი პრემიერის მხრიდან მისი და მისი გუნდის მისამართით გამოთქმულ კრიტიკას უპასუხა. ივანიშვილის განცხადებას იმასთან დაკავშირებით, რომ „თავისუფალმა დემოკრატებმა“ ბოლო წლების განმავლობაში საკუთარი სახე არც თუ ისე კარგად აჩვენა და ვერ შეძლებს ნათესაობის ფაქტორის გადალახვა ალასანია ჭორაობად აფასებს და აცხადებს, რომ ივანიშვილს არ სჭირდება „თავისუფალი დემოკრატების“ მსგავსი პრინციპული პარტია და მათკენ მიმართული კრიტიკაც ამის დასტურია:

„ივანიშვილმა კიდევ ვერ გაიაზრა, რა მოხდა 2 წლის წინ, ვერ დააზუსტა მიზეზები და ისევ რჩება ამ უსაფუძვლო ენის მიტან-მოტანის და ჭორაობის დონეზე და ვერ ამაღლდა საკუთარ თავზე და საკუთარ ეჭვებზე. ივანიშვილს არ ჭირდება „თავისუფალი დემოკრატების“ მსგავსი პრინციპული პარტია. ივანიშვილის განცხადებები პირდაპირ ადასტურებს იმას, რომ კაბელების საქმე თავიდან ბოლომდე პოლიტიზირებულია და ივანიშვილი ჩართულია ამ საქმეში. კიდევ ერთხელ დასტურდება, რომ „თავისუფალი დემოკრატები“ ვართ ერთიანი შეკრული გუნდი და არ ვტოვებთ ერთმანეთს. თავდაცვის სამინისტროს თანამშრომლების დაკავების შემდეგ მე შემეძლო შემენარჩუნებინა თანამდებობა და დავლოდებოდი გამოძიებას, მაგრამ დამეკარგა სახე და ღირსება. ჩვენ „თავისუფალი დემმოკრატები“ ბიძინა ივანიშვილისგან განსხვავებით არასდროს ვკარგავთ ღირსებას და სახეს. მე მინდა პირდაპირ ვუთხრა ბიძინა ივანიშვილს, რომ ის არის წარსული, მე აღარ ვაპირებ კომენტარის გაკეთებას მის განცხადებებზე, მაგრამ ვპირდები, რომ 5 უდანაშაულო კაცის ციხეში ჩასმას არ ვაპატიებთ“- განაცხადა ირაკლი ალასანიამ.