დაკავებული გიორგი ფეიქრიშვილისა და ნოდარ ნიშნიანიძის ოჯახის წევრები აცხადებენ, რომ ახალგაზრდების დაკავების უკან საქართველოს ვიცე-პრემიერი კახა კალაძე დგას.

თათა ჩინჩალაძე მისი მეუღლის გიორგი ფეიქრიშვილის დაკავებამდე განხორციელებულ სატელეფონო საუბარს იხსენებს და ამბობს, რომ ფეიქრიშვილისგან ქვეყნის დატოვებას კახა კალაძე აქტიურად მოითხოვდა.

ვიცე-პრემიერის მოთხოვნა იყო წინასაარჩევნოდ ფეიქრიშვილს ქვეყანა დაეტოვებინა და წინასაარჩევნო პროცესებში არ ჩარეულიყო.

თათა ჩინჩალაძის თქმით, ერთ-ერთი პირი, რომელიც ფეიქრიშვილთან მოლაპარაკებაზე იყო, კახი კალაძის მეუღლის ნახევარძმაა.

„ეს ყველაფერი არის კახი კალაძის დავალებით, ის მუდმივად აგზავნიდა ჩვენთან მის მეგობრებს,"- განაცხადა ჩინჩალაძემ.

შეგახსენებთ, რომ გუშინ ჩატარდა სპეცოპერაცია, რომლის შედეგადაც სამართალდამცავებმა სამი პირი დააკავეს - 26 წლის გიორგი ყანჩაველი, 27 წლის ნოდარ ნიშნიანიძე და 30 წლის გიორგი ფეიქრიშვილი. ვრცელდება ინფორმაცია იმის შესახებ, რომ დაკავებულებს გარკვეული კავშირი ჰქონდათ სამი დღის წინ ვაკეში შეიარაღებული ტავდასხმის შედეგად მოკლულ სოსო ჯოხაძესთან.

თუმცა, შინაგან საქმეთა სამინისტროს მიერ დაკავებული გიორგი ფეიქრიშვილის ოჯახის წევრები მის კავშირს სოსო ჯოხაძის მკვლელობასთან გამორიცხავენ. იარაღის უკანონოდ ტარების ბრალდებით დაკავებული ფეიქრიშვილის ოჯახი აცხადებს, რომ მას იარაღი თავად სამართალდამცველებმა ჩაუდეს.