”რესპუბლიკელებისთვის” სახელმწიფო სრულდება იქ, სადაც მათი პარტია სრულდება

”რესპუბლიკელებისთვის” სახელმწიფო სრულდება იქ, სადაც მათი პარტია სრულდება - ივანიშვილი

პოლიტიკა - 14:53, 05 Sep, 2016

2164

ბიძინა ივანიშვილის თქმით, „რესპუბლიკურ პარტიას“ საქართველოს მოსახლეობა სწორად აფასებს და სწორედ ამიტომ აქვს ამ პარტიას 1% რეიტინგი. ამის შესახებ საქართველოს ყოფილმა პრემიერ-მინისტრმა, ბიძინა ივანიშვილმა ოზურგეთში, ტელეკომპანია GDS-ის გადაცემაში „შეხვედრები რეგიონულ მედიასთან“ განაცხადა. ივანიშვილის განცხადებით, „რესპუბლიკურ პარტიას" დადებითი თვისებებიც აქვს - „ძველი პარტიაა. თანმიმდევრულობით გამოირჩევა, იცავენ ელემენტარულ წესებს რაც აუცილებელია პოლიტიკური პარტიების არსებობისთვის, ძალიან უყვარს პროცედურული დემოკრატია“ თუმცა მათ რესურსი არ აქვთ, რომ საერთო-სახალხო საქმეზე იზრუნონ.

„ძალიან დაბალი რეიტინგი აქვს ”რესპუბლიკურ პარტიას”. 1%-იც არ უჭერს მხარს გამოკითხვებში. ამას აქვს თავისი მიზეზი. სწორედ აფასებს საზოგადოება ”რესპუბლიკური პარტიის” რეიტინგს და რატომ - ”რესპუბლიკურ პარტიისთვის” სახელმწიფო იწყება იქ, სადაც იწყება ”რესპუბლიკური პარტია” და სრულდება იქ, სადაც მთავრდება ”რესპუბლიკური პარტია”. დანარჩენი სახელმწიფო რაც ”რესპუბლიკურ პარტიაში” არ შედის, მათი ყურადღების მიღმა რჩება. კი არ ვციტირებ, მათი წევრების გამონათქვამებს ვუკეთებ სწორ ინტერპრეტაციას, რომ ილია ჭავჭავაძე არცთუ ისე კარგი კაციაო და ასეთი გამონათქვამები მათგან ხშირად გვესმის. განათლებულობით დამძიმებული თავებით ხშირად ასეთ შეფასებებს აკეთებენ და საზოგადოება ამას კარგად აცნობიერებს. მათ არ აქვთ არავითარი რესურსი საერთო სახალხო საქმესა და სახელმწიფოზე ფიქრის. ისინი ახერხებენ ერთ ჯგუფში და ერთი ჯგუფის იდეალებში ხოტბა შეასხან საკუთარ პარტიას”, - განაცხადა ივანიშვილმა.

ექსპრემიერმა კომენტარი დავით უსუფაშვილზეც გააკეთა და აღნიშნა, რომ უსუფაშვილმა პარლამენტის თავმჯდომარეობა კოალიციის დახმარებით მოახერხა:

„ისევ „ქართულ ოცნებაში“, კოალიციაში ყოფნის დროას მოახერხა უსუფაშვილმა და პარლამენტის თავმჯდომარე გახდა. ისევ ჩვენივე დახმარებით და ამას გვამადლის მუდამ.“- აღნიშნა ივანიშვილმა.