"კომფორტულად ვიყავი წინა ხელისუფლებასთან, თუ მოვისურვებდი ხელისგულზე მატარებდნენ"- ივანიშვილი

პოლიტიკა - 12:38, 05 Sep, 2016

6306

ბიძინა ივანიშვილის თქმით, მას რომ პირადი ინტერესების დაცვა სდომებოდა, ამას ყველაზე კარგად ყოფილი ხელისუფლების პირობებში მოახერხებდა, მაგრამ მან პირად კომფორტზე იმის გამო თქვა უარი, რომ ვერ აიტანა ძალადობრივი მმართველობა და ის მდგომარეობა, რაშიც ქართული საზოგადოება იყო. ამის შესახებ საქართველოს ყოფილმა პრემიერ-მინისტრმა, ბიძინა ივანიშვილმა ოზურგეთში, ტელეკომპანია GDS-ის გადაცემაში „შეხვედრები რეგიონულ მედიასთან“ განაცხადა.

„სააკაშვილს ჩემთან ქონდა ძალიან მოწიწებითი დამოკიდებულება, მეც არ მქონდა უხეში დამოკიდებულება. მივიდოდი მხვდებოდა, მაცილებდა თვალებში მიყურებდა, რომ არაფერი მწყენოდა. ჩვენ გვქონდა კულტურული დამოკიდებულება, ერთი უხეში სიტყვა არ უკადრებია არასდროს. მე რომ მდომებოდა, კომფორტულად ვიყავი წინა ხელისუფლებასთან, თუ მოვისურვებდი ხელისგულზე მატარებდნენ. მაგრამ ის რაც მათ ქნეს და რა დღეში ჩააგდეს საზოგადოება ეს არ ავიტანე და ამისთვის მმოვედი პოლიტიკაში. მე რომ პირადული რამე მქონოდა, შეიძლება ყველაზე კომფორტულად მათი ხელისუფლების დროს მეცხოვრა. ძალადობა იყო მათი კულტი, დღესაც მხოლოდ ძალადობას ვერ ანებებენ თავს, ესაა მთელი პრობლემა „ნაციონალური მოძრაობის“. მე არავის განადგურება არ მინდა, მაგრამ მათ უარი უნდა თქვან ძალადობაზე. გაიხსენეთ ჭიაბერაშვილის ნაწერები, ის ამბობს რომ ქაოსურ და გაუგებარ დემოკრატიას, სტაბილური ავტოკრატია სჯობს, თუ ამას დავამატებთ სააკაშვილის მეუღლის გამონათქვამებს, რომ ხალხს თურმე მიშასი უნდა ეშინოდეს. დღეს გვეუბნებიან რომ თვალებში ჩახედა და იმას აღარ იკადრებს, რას არ იკადრებს? გაუპატიურებები არ იქნება? მკვლელობები და წამებები აღარ იქნება? რეალურად მათი იდეოლოგია იყო ასეთი ავტოკრატია უნდა ყოფილიყო და ამით გააძლიერებდნენ დემოკრატიას და ეკონომიკას.“- განაცხადა ბიძინა ივანიშვილმა.

ბიძინა ივანიშვილის თქმით ციხის კადრები გამაოგნებელი არა საქართველოს მოქალაქეებისთვის, არამედ უცხოელებისთვის იყო, რადგან საქართველოს მოსახლეობამ ისედაც იცოდა რა ხდებოდა ციხეებში.

„ნაციონალები ამას რეკლამასაც უკეთებდნენ, ხშირად აბსოლუტურად უდანაშაულოს იჭერდნენ, რომ მეზობელს დაენახა, აი შენც თუ არ გაჩერდები, ეს მოგელის. ციხეში თუ მოხვდები, იქ სიკვდილი მოგელის. დღესაც მათი ხელწერა ძალადობაა, რითაც შეუძლია იმით ძალადობენ“- აღნიშნა ივანიშვილმა.