ირაკლი ალასანია საინვესტიციო კონფერენცია – ,,წყალტუბო 2016“ ფარგლებში ინვესტორებს შეხვდა

პოლიტიკა - 15:11, 03 Sep, 2016

1353

ირაკლი ალასანია საინვესტიციო კონფერენცია – ,,წყალტუბო 2016“ ფარგლებში ინვესტორებს შეხვდა. „ირაკლი ალასანია - თავისუფალი დემოკრატების“ მაჟორიტარი დეპუტატობის კანდიდატ ვალერი ჩეჩელაშვილის ინიციატივით წყალტუბოში საერთაშორისო დონის ინვესტორებთან შეხვედრა პირველად ჩატარდა.

„თავისუფალი დემოკრატები“ ვმუშაობთ იმისთვის, რომ ქვეყნის მომავალი იყოს უკეთესი“, - განაცხადა ირაკლი ალასანიამ წყალტუბოში, სასტუმროში „პრომეთში“ გამართულ საინვესტიციო კონფერენციაზე, რომელიც – ,,წყალტუბო 2016“ ფარგლებში გაიმართა. „თავისუფალი დემოკრატების“ ლიდერი სხვადასხვა ქვეყნიდან (უკრაინა, მოლდოვა, რუსეთის ფედერაცია, შვეიცარია, აზერბაიჯანი, გერმანია აშშ) მოწვეულ ინვესტორებს შეხვდა და წყალტუბოს სტრატეგიული განვითარების გეგმა და პერსპექტივები გააცნო.

„ვალერი ჩეჩელაშვილის ინიციატივით დღეს წყალტუბოში ჩამოსულები არიან საერთაშორისო ბიზნეს წრეების წარმომადგენლები და ის ინვესტორები, რომლებიც წყალტუბოს განვითარების პროცესში დიდ წვლილს შეიტანენ. ეს ფაქტი კიდევ ერთხელ ადასტურებს იმას რომ, „თავისუფალ დემოკრატებს“ შეგვიძლია საქმის კეთება და უკეთესი მომავლის შექმნა, ჩვენი გუნდი პროფესიონალებისგან შედგება მათ ქვეყნის განვითარებისთვის ბევრი სასიკეთო საქმე გაუკეთებიათ და პარლამენტიდან კიდევ უფრო მეტს გავაკეთებთ უკეთესი ქვეყნის ასაშენებლად“, - განაცხადა ირაკლი ალასანიამ ინვესტორებთან შეხვედრისას.

„თავისუფალი დემოკრატების“ ლიდერმა და მოწვეულმა სტუმრაბმა დეტალურად ისაუბრეს იმ ინვესტიციებზე, რომლებიც შეიძლება განხორციელდეს წყალტუბოში. ირაკლი ალასანიას თქმით, ეს პროცესი არ შეჩერდება და კიდევ უფრო გააქტიურდება.

წყალტუბოს საინვესტიციო კონფერენციაში - ,,წყალტუბო 2016“ მონაწილეობდნენ უკრაინიდან, მოლდოვადან, რუსეთის ფედერაციიდან, შვეიცარიიდან, აზერბაიჯანიდან, გერმანიიდან, ამერიკის შეერთებული შტატებიდან ჩამოსული ინვესტორები. „თავისუფალ დემოკრატებთან“ ერთად მათ წყალტუბოს საინვესტიციო გარემო, ბიზნესის სტრატეგიული განვითარების გეგმა და პერსპექტივები განიხილეს, საუბარი აგრეთვე შეეხო სხვადასხვა პროექტების განხორციელებას.