საკონსტიტუციო სასამართლოს შესახებ კანონში ახალი ცვლილებებია მოსალოდნელი. აღნიშნული ინიციატივით ეკა ბესელია და გედევან ფოფხაძე გამოდიან.

კანონპროექტი ჯერ კიდევ 24 ივნისს არის ინიცირებული, თუმცა მისი განხილვა ამ დრომდე არ მომხდარა.

საუბარია ცვლილებებზე, რომელიც მოსამართლის უფლებამოსილების ვადის გაგრძელების შესაძლებლობას ითვალისწინებს.

დიდი ალბათობით საკონსტიტუციო სასამართლო ამ ხნის განმავლობაში მოსამართლეების გარეშე დარჩება. კანონმდებლობის მიხედვით, ახალი კანდიდატების დასახელების ვადა 1 სექტემბრიდან უნდა დაიწყოს - პრეზიდენტმა, უზენაესი სასამართლოს პლენუმმა და პარლამენტმა არაუგვიანეს 10 ოქტომბრისა ახალი მოსამართლეები უნდა წარადგინონ, აქედან ორ მოსამართლეს პრეზიდენტი ნიშნავს, ერთს უზენაესი სასამართლოს თავმჯდომარის წარდგენით პლენუმი, ხოლო ერთი მოსამართლე საქართველოს პარლამენტმა ხმათა უმრავლესობით უნდა წარადგინოს.

აღნიშნული მოსალოდნელი ცვლილების შესაფასებლად „ნიუპოსტი“ კონსტიტუციონალისტ ვახუშტი მენაბდეს დაუკავშირდა. რომელმაც ჩვენთან საუბრისას აღნიშნა, რომ მიზანშეწონილი არ არის ვადის გაზრდა და ცვლილების შემთხვევაში, საკონსტიტუციო სასამართლოს ეფექტური საქმიანობის პრობლემა ექმნება:

„იმიტომ ცვლიან, რომ ვერ ასწრებენ დაკომპლექტებას, პარლამენტი ვერ ასწრებს არჩევას. არსებითი მანდ არაფერი არ არის, გარდა იმისა, რომ ტექნიკურად ვერ ასწრებენ, ამიტომ იცვლება სამთვიანი ვადით. პრობლემა არის ის, რომ რეალურად საკონსტიტუციო სასამართლო სამი თვის განმავლობაში შესაძლოა დარჩეს სამი მოსამართლის გარეშე, რაც ზრდის ალბათობას იმისა, რომ სასამართლოში პროცესები შეყოვნდეს და ეფექტურად ვეღარ განახორციელოს საკუთარი უფლებამოსილება. მიზანშეწონილი არ არის ვადის გაზრდა“, - განაცხადა ვახუშტი მენაბდემ.