"ბურჭულაძე ჩემთან მოვიდა უგულავასგან დაჯილდოებული საათით, არ ისურვა ჩვენთან თანამშრომლობა"- ივანიშვილი

პოლიტიკა - 15:03, 01 Sep, 2016

10752

ექსპრემიერ ბიძინა ივანიშვილის თქმით, ის პაატა ბურჭულაძესთან თანამშრომლობას აპირებდა, თუმცა მასთან შეხვედრაზე ბურჭულაძე გიგი უგულავასგან ნაჩუქარი საათით მივიდა და არც თანამშრომლობა არ შედგა.
ივანიშვილის განცხადებით, ბურჭულაძემ თავისი ადგილი იპოვა და ნაციონალებთან გაერთიანდა. ამის შესახებ განცხადება ივანიშვილმა ტელეკომპანია GDS-ის გადაცემაში - „შეხვედრები რეგიონულ მედიასთან“ პაატა ბურჭულაძისა და ვაშაძე-ჯაფარიძის გაერთიანების შესახებ დასმულ კითხვაზე საპასუხოდ გააკეთა.
სიტუაციის არევის მცდელობად აფასებს ივანიშვილი სოციალურ ქსელში გავრცელებულ ფოტოსაც, სადაც გიორგი ვაშაძე ნოდარ ხადურთან ერთად არის ასახული:

„ვაშაძეს ჩაეთვალა, კარგი ფინტი ჩაუტარა „ქართულ ოცნებას“. ამით უნდოდათ, რომ სიტუაცია არიონ და ეჩვენებინათ, ვითომ ის დამოუკიდებელია. თუმცა ეს არის ტიპიური „ნაციონალური მოძრაობა“, ყველაზე დიდი პირველი ნომერი „ნაციონალური მოძრაობის“ და ბურჭულაძეც იქ მივიდა. აღარ იკადრა სიცრუე და მივიდა იქ, სადაც უნდა მისულიყო. მე მსურდა, რომ ბურჭულაძეს გვერდით დავდგომოდი, მაგრამ ჩემთან მოვიდა უგულავასგან დაჯილდოებული საათით, რაღაც ხუთი - ათი წუთით და მეტი რა უნდა მეთქვა. არჩევნებისთვის ვემზადებოდით. მან არ ისურვა ჩვენთან თანამშრომლობა”, - განაცხადა ბიძინა ივანიშვილმა.