ქართველმა ხალხმა შეარქვა გოცირიძეს „ალ კუპონე“ და კუპონებს

ქართველმა ხალხმა შეარქვა გოცირიძეს „ალ კუპონე“ და კუპონებს - „გოცირიკები"- ნოდარ ჯავახიშვილი

პოლიტიკა - 12:48, 01 Sep, 2016

2319

რეგიონული განვითარებისა და ინფრასტრუქტურის მინისტრი ნოდარ ჯავახიშვილი „ერთიანი ნაციონალური მოძრაობის“ წევრს და ეროვნული ბანკის ყოფილ პრეზიდენტს რომან გოცირიძეს აკრიტიკებს და მისი სებ-ის ხელმძღვანელად მუშაობის პერიოდს უარყოფითად აფასებს. ჯავახიშვილის თქმით გოცირიძის ოფიციალური სტატუსი მხოლოდ სააკაშვილის ეკონომიკური მრჩევლობაა. აღნიშნული განცხადება ჯავახიშვილმა „პალიტრანიუსის“ გადაცემა „360 გრადუსში“ სტუმრობისას გააკეთა.

„მე ჟურნალისტებს არაერთხელ ვთხოვე სააკაშვილის ეკონომიკურ მრჩეველს მაინცდამაინც დიდ რეკლამას ნუ გაუწევთ. გოცირიძისთვის ძალიან დიდი პატივია ის, რომ მის სისულელეებს პასუხები ტელევიზიიდან გავცე. როცა ის გახდა ეროვნული ბანკის პრეზიდენტი, მაშინ გავაკეთე ძალიან მოკლე განცხადება, რომ ერთადერთი კაცი, ვინც არ შეიძლება გახდეს ეროვნული ბანკის პრეზიდენტი, არის რომან გოცირიძე. რას ბჟუტურებს რომან გოცირიძე?! „მადლიერმა“ ქართველმა ხალხმა შეარქვა გოცირიძეს „ალ კუპონე“ და კუპონებს - „გოცირიკები“. ახლა რამდენიც გინდა აქნიოს ფეხები, ეს ფაქტია. გოცირიძე რომ იმას დაიბრალებს, ლარი მე შევქმენიო. შემიძლია გაჩვენოთ რა ფული დაამზადეს ჩემს ეროვნული ბანკის პრეზიდენტად მოსვლამდე. ის ფული რომ დაგვებეჭდა, სასაცილო იქნებოდა, სატირალი თუ არა. მე მაქვს მანამდელი ლარებიც და ის, რაც მერე გამოვიდა მიმოქცევაში - ისინი ცა და დედამიწასავით განსხვავდება. ის იყო სასაცილო, შემარცხვენელი ქვეყნისა. გოცირიძე წერს, რომ ჩემს დროს ინფლაცია არ იყო, ჯავახიშვილის დროს მოხდაო. რასაკვირველია - გოცირიძის დროს გაიცა წარმოუდგენელი რაოდენობის სესხები ეროვნული ბანკიდან, თუმცა იმის გამო, რომ კუპონები ფიზიკურად არ იყო, არ იყო გამოხატული ბაზარზე, ხოლო როგორც კი ჩამოვიდა მათი შეკვეთილი და დაბეჭდილი კუპონი, იმ დღესვე დაარტყა ინფლაციამ ქართულ ბაზარს“- განაცხადა ნოდარ ჯავახიშვილმა.