"წაყენებული ბრალი ანტიკონსტიტუციურია" - ე.წ კაბელების საქმის ადვოკატები ომბუდსმენის დასკვნას ეხმაურებიან

პოლიტიკა - 15:39, 31 Aug, 2016

1123

ე.წ. კაბელების საქმის ადვოკატებმა ომბუდსმენის დასკვნასთან დაკავშირებით საგანგებო ბრიფინგი გამართეს და განაცხადეს, რომ დასკვნის საფუძველზე შესაძლებელია ითქვას რომ ისინი არიან დაპატიმრებული სრულიად უსაფუძვლოდ.

ადვოკატების განმარტებით, სახალხო დამცველმა საქმის გარემოებების შესწავლის შემდეგ დაასკვნა, რომ მუხლი, რომელსაც საერთო სასამართლო ე.წ. კაბელების საქმეზე მსჯავრდებულების დამნაშავედ ცნობისას დაეყრდნო, ანტიკონსტიტუციურია.

"საქართველოს სისხლის სამართლის კოდექსი 182-ე მუხლი იძლევა მისი არასწორი ინტერპრეტაციის შესაძლებლობას, რაც ეწინააღმდეგება საქართველოს კონსტიტუციის 42-ე მუხლის მე-5 პუნქტით გარანტირებულ უფლებას," - განმარტავს სოსო ბარათაშვილი.

ბარათაშვილის განცხადებით, მათ დღეს გადაეცათ საქართველოს სახალხო დამცველის დასკვნა ე.წ. კაბელების საქმეზე, სადაც ადვოკატის ინფორმაციით, წერია, რომ საქართველოს სისხლის სამართლის კოდექსის მიხედვით, მსჯავრდებულთათვის წაყენებული ბრალი, ჯგუფის მიერ წინასწარ შეთანხმებით დანაშაულის ჩადენა, საქმეში საერთოდ არ არის. დასკვნაში პირდაპირ წერია, რომ სასამართლოს მიერ მიღებული გადაწყვეტილება არის არაკონსტიტუციური.

„სახალხო დამცველის დასკვნიდან პირდაპირ შეგვიძლია დავასკვნათ, რომ ის ხუთი ადამიანი რომელიც დღეს არის მსჯავრდებული ე.წ. კაბელების საქმეზე და ბრალად ედებათ საქართველოს სისხლის სამართლის კოდექსის 182 მუხლით გათვალისწინებული დანაშაულის, გაფლანგვის ჩადენა, ისინი არიან დაპატიმრებული სრულიად უსაფუძვლოდ და თუ გავითვალისწინებთ კონტექსტს ამ საქმისა, ისინი არიან პოლიტიკური ნიშნით დაპატიმრებულნი,“-განაცხადა ადვოკატმა სოსო ბარათაშვილმა.

სოსო ბარათაშვილის ინფორმაციით, სახალხო დამცველის დასკვნა ასევე უკვე გადაეგზავნა საკონსტიტუციო სასამართლოს, რომელიც ე.წ. კაბელების საქმეს განიხილავს.

ბრიფინგზე ადვოკატმა ლევან სამუშიამ მიმართა საკონსტიტუციო სასამართლოს, რომ ხვალ ჩანიშნული პროცესი კიდევ ერთხელ არ ჩაშალოს. სამუშია ამბობს, რომ ომბუდსმენის დასკვნის სახით, დაცვის მხარეს ხელთ აქვს უმნიშვნელოვანესი დოკუმენტი.

„სიტყვა სიტყვით სახალხო დამცველი ამბობს, რომ ანგარებითი მოტივის გარეშე არ შეიძლება დანაშაული, რასაც გვეუბნებოდა ბუგიანიშვილი და მურუსიძის სასამართლო, რომ არც ანგარებას აქვს მნიშვნელობა და ეს ხალხი არიან დამნაშავეები, სახალხო დამცველი ამბობს, რომ საქართველოს კონსტიტუციის 42-ე მუხლსაც პირდაპირ ეწინააღმდეგება ეს მსჯელობა. აქედან გამომდინარე მივმართავ იმ გუნდს, რომელსაც ეჭვი ეპარებოდა, წაიკითხონ სახალხო დამცველის დასკვნა და გააკეთონ ობიექტური და მიუკერძოებელი დასკვნები, მიუხედავად მათი პოლიტიკური კუთვნილებისა,“ - განაცხადა ლევან სამუშიამ.