2016 წლის ივლისში ჩატარებული პედაგოგთა საგნის გამოცდაზე გასული 17 137 აპლიკანტიდან გამოცდა წარმატებით მხოლოდ 3 464 დასძლია, რაც საერთო ჯამში 20.21 %-ია. ზაფხულის გამოცდაზე სულ 22 700-ის აპლიკანტი იყო დარეგისტრირებული. თუმცა ტრადიციულად მაღალი იყო გამოცდაზე არ გასული პირების რაოდენობაც. წელს რეგისტრაცია გაიარა და გამოცდაზე არ გავიდა 5 500 პირი.

„ნიუპოსტი“ აღნიშნულის შესაფასებლად საქართველოს განათლებისა და მეცნიერების ყოფილ მინისტრს, დიმიტრი შაშკინს დაუკავშირდა. შაშკინი პედაგოგთა სასერტიფიკატო გამოცდების შედეგებს კატასტროფულს უწოდებს და საუბრობს სამ მიზეზზე, რომელმაც ასეთი დაბალი პროცენტული მაჩვენებელი გამოიწვია:

„პედაგოგთა ტესტირების მაჩვენებლები არის ძალიან მძიმე, მაგრამ ეს არავითარ შემთხვევაში არ არის პედაგოგების ბრალი. ამის სამი მიზეზი არსებობს.

პირველი არის ის, რომ „ქართული ოცნება“ ჯერ კიდევ 2012 წელს თამაშობდა ამ საკითხთან დაკავშირებით და აგზავნიდა მესიჯებს პედაგოგებთან, რომ სასერტიფიკაციო გამოცდები გაუქმდებოდა, რაც ბუნებრივია, მაშინვე იყო ტყუილი და პედაგოგების შეცდომაში შეყვანის მცდელობა.

მეორე მიზეზი არის ის, რომ როდესაც ჩვენ შემოვიღეთ სასერტიფიკაციო გამოცდები, ვთქვით, რომ გამოცდა არ არის თვითმიზანი, ეს არის ერთ-ერთი საფეხური იმისათვის, რომ მასწავლებლებს კვალიფიკაციის ამაღლებაში დავხმარებოდით. სანამ ჩვენ დავიწყებდით ამ გამოცდებს, ჩვენ ძალიან ბევრი ფული ჩავდეთ პედაგოგების კვალიფიკაციის ამაღლებაში. ჩვენ ეს პროგრამა დავიწყეთ 2011 წელს, 2012 წელს ამ ხელისუფლებას ერთ წელიწადში 60 ათასი პედაგოგიდან 26 ათასი სერტიფიცირებული პედაგოგი დავუტოვეთ ანუ 1/3-ზე მეტი პედაგოგი უკვე იყო სერტიფიცირებული. ეს ხელისუფლება არ დებს ფულს პედაგოგების კვალიფიკაციის ამაღლებაში. ამ ხელისუფლებამ გააჩერა მასწავლებლების სახლების მშენებლობა საქართველოს მასშტაბით და გვაქვს მხოლოდ ის, რაც ჩვენ გავაკეთეთ, თბილისი და ქუთაისი. უკვე დაძრული პროექტები გააჩერეს. მასწავლებლის კვალიფიკაციის ამაღლების ცენტრის წლიური ბიუჯეტი, რაც ჩვენ დავუტოვეთ, არის 26 მილიონი ლარი, ეს თანხა იხარჯება ამ ცენტრის თანამშრომლების ვოიაჟებში ევროპაში და ყავის სმაში.

მესამე მიზეზი კი არის ის, რომ საქართველოში ამ ხელისუფლებას სამწუხაროდ არ გააჩნია განათლების სისტემის განვითარების არავითარი ხედვა. ყველა რეფორმა, რომელიც ჩვენ დავიწყეთ განათლებაში, არის განადგურებული და ამ ხელისუფლებამ მოახერხა ის, რომ განათლების სისტემა დააბრუნდა 90-იან წლებში“, - აცხადებს დიმიტრი შაშკინი.