საქართველოში რამდენიმე ახალი ავტომაგისტრალის და გზის მშენებლობა იგეგმება

პოლიტიკა - 13:58, 30 Aug, 2016

2253

საქართველოს პრემიერ-მინისტრი მცირე ბიზნესის წარმომადგენლებს შეხვდა. გიორგი კვირიკაშვილმა ბიზნესმენებთან ინფრასტრუქტურულ პროექტებზე ისაუბრა და აღნიშნა, რომ მომავალი ოთხი წლის განმავლობაში აღმოსავლეთ-დასავლეთის ჩქაროსნული მაგისტრალის, თბილისიდან ლაგოდეხის მიმართულებით აზერბაიჯანთან დამაკავშირებელი ავტობანის და მცხეთიდან ვლადიკავკაზამდე ავტობანის დასრულება იგეგმება:

“ოთხი წლის განმავლობაში ვგეგმავთ, დავასრულოთ აღმოსავლეთ-დასავლეთის ჩქაროსნული მაგისტრალი, სარფიდან დაწყებული წითელ ხიდამდე და სადახლომდე. ასევე ავაშენოთ თბილისიდან ლაგოდეხის მიმართულებით აზერბაიჯანთან დამაკავშირებელი ავტობანი. ვფიქრობთ, გავაფართოვოთ მცხეთა-ლარსის არსებული გზა. ინჟინრები მუშაობენ ალტერნატიულ გადაწყვეტაზეც, რომ აშენდეს ფასიანი გზა, რომელიც იქნება გვირაბებით დაკავშირებული და აღარ იქნება საჭირო სტეფანწმინდაში ჩასასვლელად გუდაურის გადავლა. ვფიქრობთ, რომ ეს გზა მთლიანად ავაცილოთ დევდორაკის მონაკვეთს, სადაც ყოველწლიურად პრობლემები იქმნება. უკვე უახლოეს პერიოდში დაიწყება ლენტეხიდან შემოვლითი გზის მშენებლობა მესტიის მიმართულებით, უშგულის გავლით, მაგრამ ეს გზა საკმარისი არ იქნება კურორტ თეთნულდის განვითარებისთვის. ამიტომ იქ საჭიროა გვირაბების აშენება. ასევე ვფიქრობთ, რომ ქუთაისიდან სამხრეთ საქართველოსკენ მიმავალი გზა ოთხ წელიწადში ავაშენოთ. დაწყებულია დაპროექტების სამუშაოები. ეს იქნება საჭირო იმისთვის, რომ ქუთაისი გავხადოთ ქვეყნის შიდა ჰაბი”, - აღნიშნა გიორგი კვირიკაშვილმა.