რესპუბლიკურმა პარტიამ ცესკოს წინააღმდეგ შეტანილ სარჩელზე საქალაქო სასამართლოს გადაწყვეტილება ზემდგომ სასამართლოში გაასაჩივრა. დააკმაყოფილებს თუ არა საააპელაციო სასამართლო რესპუბლიკელების სარჩელ, ჯერჯერობით უცნობია. საკითხზე მსჯელობა დღეს ან ხვალ მოხდება.

რესპუბლიკური პარტია იმ ნორმატიული აქტის ბათილად ცნობას ითხოვს, რომლითაც ცესკო-მ ახალ მემარჯვენეებსა და პატრიოტთა ალიანსს საარჩევნო ნომერი წილის ყრის გარეშე მიაკუთვნა.

„ვითხოვთ საქალაქო სასამართლოს გადაწყვეტილების გაუქმებას და შესაბამისად, ცესკოს დადგენილების ბათილად ცნობას, რომლის მიხედვითაც, რამდენიმე პოლიტიკურ სუბიექტს უკვე მიეცა საშუალება, რომ გამოიყენოს საარჩევნო ნომერი. მე ცესკოს დადგენილებაში ნამდვილად ვხედავ პოლიტიკურ მოტივაციას, სასათბურე პირობები შეუქმნას ორ პარტიას. ეს ცალსახად არის საარჩევნო სუბიექტების არათანაბარ მდგომარეობაში ჩაყენება ,“ - განაცხადა თამარ ხიდაშელმა.