,,შოთა მალაშხია ,,ნაციონალური მოძრაობის“ წევრი არ ყოფილა“

,,შოთა მალაშხია ,,ნაციონალური მოძრაობის“ წევრი არ ყოფილა“ - მიხეილ მაჭავარიანი

პოლიტიკა - 13:26, 29 Aug, 2016

5494

კოალიცია „ერთიანი ნაციონალური მოძრაობა“ შოთა მალაშხიამ დატოვა.
„ქრისტიან-კონსერვატიული პარტია" თვითმმართველობის არჩევნების დროს ენმ-სთან იყო კოალიციაში.

არსებული ინფორმაციით, მალაშხიამ გადაწყვეტილება მას შემდგ მიიღო, რაც გამსვლელ სიაში ვერ მოხვდა.

მალაშხია გადაწყვეტილების მიზეზებზე დამატებით კომენტარს არ აკეთებს.

"ნიუპოსტი" "ნაციონალური მოძრაობის" ერთ-ერთ ლიდერს მიხეილ მაჭავარიანს ესაუბრა, რომელიც არ ეთანხმება სიტყვათა კომბინაციას, რომ შოთა მალაშხიამ "ერთიანი ნაციონალური მოძრაობა" დატოვა. როგორც მაჭავარიანი განმარტავს, მალაშხია ენმ-ს წევრი არ ყოფილა, "ქრისტიან-კონსერვატიული პარტია" კოალიციაში თვითმმართველობის არჩევნების დროს შედიოდა, თუმცა 2016 წელს გადაწყდა, რომ ეს თანამშრომლობა არ გაგრძელებულიყო.

"ნაციონალურმა მოძრაობამ პოლიტსაბჭოზე გადაწყვიტა, რომ მალაშხიას პარტიასთან თანამშრომლობას არ აგრძელებდა. ამიტომ ბუნებრივად გამოირიცხა, საკითხი რომ სიაში ყოფილიყო ბატონი მალაშხია ან ვინმე. თვითმმართველობის არჩევნებისთვის, მსგავსი კოალიცია არსებობდა, თუმცა ეს არ მოხდა 2016 წლის არჩევნებისთვის. ამიტომ არასწორი ფორმულირებაა, რომ მალაშხიამ ნაციონალური მოძრაობა დატოვა. პოლიტსაბჭოს გადაწყვეტილებით ხელშეკრულება გავაფორმეთ ევროპულ საქართველოსთან და არა მალაშხიას პარტიასთან, რა იქნება თვითმმართველობის არჩევნებზე ამაზე საუბარი ადრეა. საპარლამენტო არჩევნებზე ჩვენ ქრისტიან-კონსერვატიულებთან კოალიცია არ გვქონია"- ანიშნა მაჭავარიანმა.