"პაპუაშვილი და ენმ არასასურველ მოსამართლეებზე თავდასხმებს დაიწყებენ"- გედევან ფოფხაძე

პოლიტიკა - 14:30, 27 Aug, 2016

1629

გედევან ფოფხაძე ვარაუდობს, რომ უახლოეს მომავალში, საკონსტიტუციო სასამართლოს თავმჯდომარემ შესაძლოა მისთვის არასასურველი მოსამართლეების დისკრედიტაცია დაიწყოს. ამის შესახებ, გედევან ფოფხაძემ "პირველ პრესკლუბში" გამართულ პრესკონფერენციაზე განაცხადა. ფოფხაძის თქმით პაპუაშვილს ამაში ხელს ის მედიასაშუალებები შეუწყობენ, რომლებიც "ნაციონალური მოძრაობასთან“ არიან დაახლოებულნი:

"ასეთი რეალობის წინაშე ვდგებით - არის ვარაუდი, რომ საკონსტიტუციო სასამართლოს თავმჯდომარე და მისი პოლიტიკური მოკავშირეები, საუბარია "ერთიან ნაციონალურ მოძრაობაზე", მათთვის არასასურველ მოსამართლეებზე თავდასხმებს დაიწყებენ. ჩვენ შეგვიძლია ვივარაუდოთ, რომ უახლოეს მომავალში, საკონსტიტუციო სასამართლოს იმ ნაწილზე, რომელიც გიორგი პაპუაშვილის პოლიტიკურ ნებას არ ემორჩილება, იქნება თავდასხმები, მათ შორის, მათი პიროვნული დისკრედიტაციისა და შავი პიარის აგორების მიზნით. ჩვენი ინფორმაციით, ამის მონაწილე იქნება ყველა ის მედიასაშუალება, რომელიც "ნაციონალური მოძრაობის" პოლიტიკური დღის წესრიგით ცხოვრობს. ჩვენ ახლავე გვინდა ამაზე პოზიცია დავაფიქსიროთ. მე ასეთ თავდასხმებს ველოდები. ერთი თვე დარჩა პაპუაშვილსა და მის თანამოაზრე მოსამართლეებს. ამ ხნის მანძილზე, მათ პოლიტიკური დაკვეთები არ უნდა შეასრულონ. მტკიცებულების დონეზე არაფრის შემოთავაზება არ შემიძლია, დეტალებზე ვერ ვისაუბრებ, თუ რა ფორმით მოხდება მოსამართლეების დისკრედიტაცია. თუმცა, რა მცდელობაც არ უნდა იყოს მათი დისკრედიტაციის, მოსამართლეები უნდა მოიქცნენ მართლმსაჯულების ფარგლებში და კანონით დაკისრებული ვალდებულება შეასრულონ",- განაცხადა გედევან ფოფხაძემ.

მისივე თქმით, თუ დამტკიცდება, რომ საკონსტიტუციო სასამართლოში სარჩელების შეცვლის ფაქტი დაფიქსირდა, გამოძიება ბუნებრივია უნდა დაინტერესდეს.