საკონსტიტუციო სასამართლოს პლენუმის სხდომის ჩაშლასთან დაკავშირებით განმარტებებს ელიან

პოლიტიკა - 16:46, 26 Aug, 2016

1414

23 აგვისტოს საკონსტიტუციო სასამართლოში ჩაშლილი სხდომა მწვავე განცხადებების მიზეზი ხდება. საკონსტიტუციო სასამართლოში რამდენიმე თემაზე უნდა ემსჯელათ მათ შორის იმ დასკვნებზე, რომელიც ე.წ. კაბელების საქმეზე სასამართლოში შეტანილი სარჩელთან დაკავშირებით მომზადდა. არსებობს ეჭვი, რომ ე.წ. კაბელების საქმეზე სასამართლოში შეტანილი სარჩელი შეცვლილია, შეიცვალა თუ არა სარჩელი შინაარსობრივად, ამის შესახებ საკონსტიტუციო სასამართლოში ორი განსხვავებული დასკვნა მომზადდა, რომელთაგანმაც ერთ-ერთის მხარდაჭერა უნდა მომხდარიყო.

ამასთანავე პლენუმს ე.წ. კაბელების, გიგი უგულავასა და "რუსთავი ორის" საქმეებთან დაკავშირებით, რამდენიმე მოსამართლის აცილების თაობაზე, პარლამენტის შუამდგომლობა უნდა განეხილა.

მოსამართლეთა აცილებისა და სარჩელის შეცვლის საკითხების განხილვის შემდეგ კი პლენუმს უნდა დაენიშნა გახმაურებული საქმეების განხილვის თარიღიც, თუმცა, ოთხსაათიანი ლოდინის შემდეგ შეხვედრის გადადების თაობაზე მათ წერილობით ეცნობათ.

მოსამართლეები მერაბ ტურავა და ლალი ფაფიაშვილი აცხადებენ, რომ მათ არ იციან როდის გაიმართება პლენუმი, რომლის მოწვევის უფლებაც საკონსტიტუციო სასამართლოს თავმჯდომარეს აქვს. მოსამამრთლე ოთარ სიჭინავას განცხადებით კი საჭიროა გაკეთდეს განმარტებები თუ ვის ინტერესებში შედის პროცესის გაჭიანურება.