გუშინ სისხლიანი გარჩევა მოხდა ქობულეთში, რის შედეგადაც დაიღუპა ერთი და დაიჭრა 4 ახალგაზრდა. შემთხვევა რუსთაველის ქუჩაზე მოხდა. ამ დრომდე არ ვრცელდება სისხლიანი გარჩევის მოტივი.

დაღუპულია 23 წლის მამაკაცი, როგორც ცნობილია მას ჭრილობა გულის არეში, სავარაუდოდ ცივი იარაღით აქვს მიყენებული. დაშავებულები სასწრაფო დახმარების ბრიგადებმა ქობულეთის რეფერალურ საავადმყოფოში გადაიყვანეს. ერთ-ერთი ახალგაზრდა ამ დრომდე რეანიმაციაშია მოთავსებული, დანარჩენმა სამმა ახალგაზრდამ სამედიცინო დაწესებულება უკვე დატოვეს.

დაჭრილთა შორის საპატრულო პოლიციის თანამშრომელიც არის, რომელიც, როგორც ცნობილია ინციდენტში მონაწილეთა გაშველებას ცდილობდა. საქმეზე გამოძიება საქართველოს სისხლის სამართლის კოდექსის 108-ე მუხლით მიმდინარეობს, რაც განზრახ მკვლელობას გულისხმობს.