"თავისუფალი დემოკრატების’’ ლიდერი ირაკლი ალასანიამ აჭარაში მაჟორიტარი დეპუტატობის კანდიდატები წარადგინა, რის შემდგომ ხულოს, შუახევის, ქედის, ხელვაჩაურის და ქობულეთის მოსახლეობას შეხვდა. პარტის ლიდერმა თითოეულ მუნიციპალიტეტში შეხვედრები გამართა და ადგილობრივ მოსახლეობას პირადად წარუდგინა მათ მაჟორიტარი დეპუტატობის კანდიდატები.

ბიზნესმენი და რკინიგზის სფეროს სპეციალისტი ნუგზარ ვარშანიძე, ბათუმის საკრებულოს მოქმედი წევრი ნინო ბერაძე და პედაგოგი თეიმურაზ ხაბაძე. ქობულეთიდან საქართველოს პარლამენტში კენჭს იყრის რკინიგზის სფეროს სპეციალისტი სოსო ნოღაიდელი, ხელვაჩაურიდან იურისტი ნინო ლორთქიფანიძე, ხოლო ქედა-შუახევი-ხულოდან პროფესორი თეიმურაზ ავალიანი.

ირაკლი ალასანიამ შეხვედრაზე განაცხადა, რომ მის მიერ წარდგენილი მაჟორიტარები ის ადამიანები არიან, რომლებიც პარტიას დაარსების დღიდან გვერდში უდგანან და აჭარის თითოეულ ოჯახს წინსვლასა და სიკეთეს მოუტანენ.

,,ჩემს მიერ აჭარაში წარმოდგენილი არიან ის ადამიანები, რომლებიც „თავისუფალ დემოკრატებს“ უკვე რვა წელიწადია გვერდში უდგანან. განსაკუთრებით მინდა გამოვყო სულხან ღლონტი, რომელიც ჩვენი გუნდის მთავარი სულისჩამდგმელი და მხარდამჭერი ძალაა აჭარაში“, - აღნიშნა ირაკლი ალასანიამ. მისი თქმით, ამ ადამიანების წარდგენისას მათ დაამსხვრიეს ის კლიშე, რომელიც წლების განმავლობაში პარლამენტიდან პარლამენტში გადადის ოლიგარქიული თუ სხვა კავშირებით, ამიტომ კანდიდატების შერჩევისას ჩვენი მთავარი კრიტერიუმი იყო ისეთი პროფესიონალი და მრავალწლიანი გამოცდილების მქონე ადამიანების დასახელება, რომლებთანაც საკუთარი თავის გაიგივებას შეძლებს ნებისმიერი ამომრჩეველი და მათთან უშუალო და ადამიანური ურთიერთობის დამყარების საშუალება ექნება. თუმცა გამოცდილ კადრებთან ერთად გუნდში ახალი სახეებიც იქნებიან.