თბილისის საკრებულოს "ნაციონალური მოძრაობის" ფრაქციების დეპუტატებმა დავით ნარმანიასთვის უნდობლობის გამოცხადების პროცედურებისთვის ხელმოწერების შეგროვება დაიწყეს.

“დაუსრულებელი ინფრასტრუქტურული პროექტები, არაეფექტური მმართველობა და ა.შ. ეს საკმარისია იმისთვის, რომ ნარმანიამ თანამდებობა დატოვოს”- აღნიშნა ირაკლი აბესაძემ.

დეპუტატი გამოეხმაურა მერიაში გუშინ მომხდარ ინციდენტს, როდესაც ნარმანიამ სამოქალაქო აქტივისტს “მაიმუნი, ვირიშვილი” უწოდა.

“საკითხის ინიცირებისთვის და სხდომაზე დასაყენებლად საჭიროა საკრებულოს წევრთა სიითი შემადგენლობის უმრავლესობა, ამ შემთხვევაში 24 დეპუტატი, ხოლო იმისთვის, რომ საკრებულოს სხდომაზე თბილისის მერს უნდობლობა გამოეცხადოს, საჭიროა საკრებულოს წევრთა სრული შემადგენლობის 2/3, ამ შემთხვევაში 34 დეპუტატი” – განმარტა აბესაძემ.

„ნაციონალური მოძრაობის“ წარმომადგენლებმა საკრებულოში მიიმართეს მათ კოლეგებს როგორც ოპოზიციიდან, ასევე მმართველი ფრაქციიდან, შეუერთდნენ აღნიშნულ ინიციატივას.