ის ქალაქის მოსახლეობამ აირჩია, ვადის ამოწურვის შემდეგ, გადაწყვეტილებას კვლავ მოსახლეობა მიიღებს

ის ქალაქის მოსახლეობამ აირჩია, ვადის ამოწურვის შემდეგ, გადაწყვეტილებას კვლავ მოსახლეობა მიიღებს - ალიბეგაშვილი ნარმანიაზე

პოლიტიკა - 12:09, 25 Aug, 2016

2188

დავით ნარმანიას გადაყენების მოთხოვნას, საკრებულოს თავმჯდომარე, გიორგი ალიბეგაშვილი გამოეხმაურა.
მისი თქმით, დედაქალაქის მერი ქალაქის მოსახლეობამ აირჩია და ვადის ამოწურვის შემდეგ, გადაწყვეტილებას კვლავ მოსახლეობა მიიღებს.
„ჩვენმა თანამოქალაქეებმა აირჩიეს ბატონი დავით და ბუნებრივია, რომ გადაწყვეტილებას მიიღებს თავისი ვადის გასვლის შემდეგ, ქალაქის მოსახლეობა. ბოლო ხანებში ეს ასეც არის მოსალოდნელი, ყველა საკითხის პოლიტიზირება იწყება და მე ვისურვებდი, რომ უფრო საქმიან ჭრილში, საქმიან განწყობილებაზე გადავსულიყავით“ -განაცხადა ალიბეგაშვილმა.

საკრებულოს თავმჯდომარე ფაქტს, რომ ნარმანიამ გარემოსდამცველს სიტყვიერი შეურაცხყოფა მიაყენა, პროვოკაციას უწოდებს.

“ხელმოწერების საჭირო რაოდენობა ვერ მოგროვდება. რაც შეეხება კითხვას ამ შეურაცხყოფასთან დაკავშირებით, მინდა განვაცხადო შემდეგი, რომ თანამდებობის პირი არავითარ შემთხვევაში რა თქმა უნდა პროვოკაციას არ უნდა წამოეგოს. ეს იყო პროვოკაცია, მე ვესწრებოდი ამ შეხვედრას, ძალიან მიხარია, რომ სამოქალაქო საზოგადოება ესე არის გამოფხიზლებული და გააქტიურებული, მაგრამ ყველაფრის პოლიტიზირება ხდება და ეს არის საწყენი. მე პროვოკაციას არ წამოვეგებოდი, შესაბამისად ბოდიშის მოხდა არ დამჭირდებოდა,“ - განაცხადა ალიბეგაშვილმა.

ნარმანიამ არასამთავრობო ორგანიზაციის წევრს ”მაიმუნი ვირიშვილი” უწოდა. მოსახლეობა და ენჯეოები მის გადადგომას მოითხოვს.