ირაკლი ალასანიამ აჭარაში მაჟორიტარობის კანდიდატები წარადგინა

პოლიტიკა - 20:43, 24 Aug, 2016

2139

"თავისუფალმა დემოკრატებმა" აჭარაში მაჟორიტარობის კანდიდატები წარადგინა. პარტიის ლიდერმა ირაკლი ალასანიამ ბათუმში, სასტუმრო "ადმირალში" შეკრებილ მხარდამჭერებს სიტყვით მიმართა და აღნიშნა, რომ მაჟორიტარობის კანდიდატებთან ერთად აჭარას უკეთესს და უფრო განვითარებულს გახდის.

„ჩემს თანამებრძოლებთან ერთად დღეს აჭარის საზოგადოებას, ბათუმს წარვუდგენთ იმ კანდიდატებს, რომლებიც უკვე დიდი ხანია ბრძოლაში გვყავს გამობრძმედილი, წარმოგიდგენთ ასევე სიახლესაც, რომელიც ავსებს ჩვენს გუნდს კომპეტენციით, კვალიფიკაციით, რითიც „თავისუფალი დემოკრატები“ ყოველთვის გამოვირჩევით ქართულ პოლიტიკაში. უპირველეს ყოვლისა მინდა მადლიერება გამოვხატო ჩემი თანამებრძოლის, ჩემი სულიერი ძმის, „თავისუფალი დემოკრატების“ აჭარის ორგანიზაციის დამფუძნებლის, სულხან ღლონტის მიმართ, რომელიც აქ არის და დარწმუნებული ვარ, რომ ის ორგანიზაცია, რომელიც ერთად შევქმენით - 2016 წლის ოქტომბრის არჩევნებში დაანახებს საზოგადოებას, არა მარტო აჭარას, არამედ მთელ საქართველოს, რომ ჩვენი გუნდი ერთ მუშტად არის შეკრული, ეს გუნდი პატრიოტების, პროფესიონალების გუნდია და ხელისუფლებაში იმიტომ არ მოვდივართ, რომ ხელსიუფლებაში ყოფნა ჩვენი თვითმიზანია“. თავისუფალი დემოკარტების“ მიზანია, რომ აჭარა, როგორც უზენაეს საბჭოში, ასევე საქართველოს პარლამენტში წარმოდგენილი იყოს იმ ადამიანებით, ვისაც ეს მხარე უყვარს“, -განაცხადა ირაკლი ალასანიამ.

"თავისუფალი დემოკრატების" აჭარის საარჩევნო გუნდი ძველი და ახალი სახეებით დაკომპლექტდა. საქართველოს პარლამენტის დეპუტატობის კანდიდატები ბათუმიდან იქნებიან ბიზნესმენი და რკინიგზის სფეროს სპეციალისტი ნუგზარ ვარშანიძე, ბათუმის საკრებულოს მოქმედი წევრი ნინო ბერაძე და პედაგოგი თეიმურაზ ხაბაძე. ქობულეთიდან საქართველოს პარლამენტში კენჭს იყრის რკინიგზის სფეროს სპეციალისტი სოსო ნოღაიდელი, ხელვაჩაურიდან იურისტი ნინო ლორთქიფანიძე, ხოლო ქედა-შუახევი-ხულოდან პროფესორი თეიმურაზ ავალიანი. აჭარის უმაღლესი საბჭოს არჩევნებში, რომელიც საქართველოს პარლამენტის პარალელურად ტარდება, ბათუმიდან კენჭს იყრიან ბათუმის საკრებულოს მოქმედი დეპუტატები ჯაბა ბერიძე და კობა ჩხეიძე და შუახევის საკრებულოს მოქმედი დეპუტატი არმაზ ბახტაძე. ქობულეთიდან აჭარის უმაღლეს საბჭოში მოსახვედრად იბრძოლებს ბიზნესმენი კახა კაკალაძე, ხელვაჩაურიდან კენჭს იყრის სპორტსმენი, იურისტი პაატა ზაქარაძე, ხოლო ქედა-შუახევი-ხულოდან პროფესორი ოთარ ცეცხლაძე. ირაკლი ალასანიას განცხადებით, წარმოდგენილი კანდიდატები გამორჩეულნი არიან თავიანთი საქმიანობის სფეროში და შეუძლიათ აჭარის რეგიონის სამაგალითოდ განვითარება.