ირაკლი ჩიქოვანი - „ზუგდიდი უნდა გახდეს ტურისტული ჰაბი“

პოლიტიკა - 18:32, 24 Aug, 2016

2390

„ზუგდიდი უნდა გახდეს ტურისტული ჰაბი“ - ამის შესახებ „ირაკლი ალასანია - თავისუფალი დემოკრატების“ ქალაქ ზუგდიდის მაჟორიტარი დეპუტატობის კანდიდატმა ირაკლი ჩიქოვანმა ზუგდიდის დადიანების სასახლის ეზოში საზოგადოების წარმომადგენლებთან შეხვედრის დროს განაცხადა. დეპუტატობის კანდიდატმა სიტყვით გამოსვლისას ქალაქ ზუგდიდის განვითარების მისეული ხედვა გააცნო შეკრებილებს. ირაკლი ჩიქოვანის განცხადებით, მისი ერთ-ერთი მთავარი დაპირება იქნება ზუგდიდის მცირე ბიზნესის ხელშეწყობის ცენტრის შექმნა, რომელიც ახალბედა ბიზნესმენებს, ადგილობრივებს დაეხმარება კონკრეტული ბიზნესიდეა რეალობად აქციონ და საქმე წამოიწყონ. ირაკლი ჩიქოვანის განცხადებით, აღნიშნული პროექტი ხელს შეუწყობს ახალგაზრდების „ადგილზე დამაგრებას“ და შეამცირებს გადინების პროცესს. დეპუტატობის კანდიდატის განმარტებით, ცენტრი მისცემს საშუალებას დაინტერესებულ პირებს ადგილზე შეისწავლონ საქმე გამოცდილი სპეციალისტებისგან.

ირაკლი ჩიქოვანის განცხადებით, აუცილებელია ტურიზმის განვითარება, რომელიც დასაქმებას შეუწყობს ხელს და ამისათვის აუცილებელია ტურიზმის, მათ შორის რელიგიური ტურიზმის განვითარება. დეპუტატობის კანდიდატის განცხადებით, ქალაქ ზუგდიდს აქვს უნუკალური შესაძლებლობა ამ მიმართულებით განვითარდეს და სამეგრელო გახდეს ტურისტული ჰაბი. ამ მიმართულებით კი, მნიშვნელოვანი კომპონენტი ჩიქოვანის განმარტებით, დადიანების სასახლისთვის, ბოტანიკური ბაღისა და ღვთისმშობლის კვართისთვის, მთელი არ კომპლექსისთვის იუნესკოს მსოფლიო მემკვიდრეობის ძეგლის სტატუსის მინიჭებაა. „მე ბოლომდე დავიხარჯები, რომ ეს კომპლექსი იყოს ისეთი კულტურული მემკვიდრეობის ძეგლი, რომელიც მსოფლიოს ყველა მოქალაქის ყურადღებას მიიპყრობს“, - აღნიშნა მაჟორიტარობის კანდიდატმა და დასძინა, რომ ის იქნება უფრო უკეთესი, გამოცდილი და ძლიერი დეპუტატი, რომელიც იზრუნებს საკუთარ მშობლიურ ქალაქზე და ყველაფერს გააკეთებს მისი პოტენციალის ასათვისებლად, რაც დღეს არ ხდება.