თბილისის მერიაში მიმდინარე შეხვედრა გარემოს დამცველებმა პროტესტის ნიშნად დატოვეს, ხმაურის ფონზე მიმდინარე მოლაპარაკებებისას შეუძლოდ გახდა „პარტიზანი მებაღეების“ წევრი, რომელიც გამწვანების სამსახურის ხელმძღვანელის გადადგომის მოთხოვნით ორი დღეა შიმშილობს.

თბილისის მერმა შეხვედრა ეკოლოგიური გეგმების განხილვით დაიწყო და საკრებულოში მისვლის მზადყოფნა გამოთქვა.

„დედაქალაქის საკრებულოს წინაშე წავრსგები კონკრეტულად გამწვანების საკითხებზე, ამიტომაც ჩვენ რა თქმა უნდა გვაქვს ჩვენი მიდგომები თუ რას ვაკეთებთ და რას ვაპირებთ სამომავლოდ. მე დღეს გავაკეთე წერილობითი დასტური, გაიგზავნა დედაქალაქის საკრებულოში, რომლის საფუძველზეც პარასკევს წარვსდგები დედაქალაქის საკრებულოს წინაშე.

რაც შეეხება დღევანდელი შეხვედრის პროვოკაციულ ნაწილს, ძალიან კარგად გამოჩნდა ის, თუ ვინ არის რეალურად მუშაობისთვის განწყობილი და ის, თუ ვინ არის დესტრუქციის მოსურნე. ჩვენ არ ვაპირებთ იმას, რომ საკუთარი სიცოცხლე რაიმეს შევწიროთ, ჯანმრთელობას არ დავდებთ მშენებლობების წილ, მაგრამ ქალაქსაც ვერ გავაჩერებთ, აუცილებლად ვიპოვით ოქროს შუალედს“, - განაცხადა დავით ნარმანიამ.