ცესკო „ახალ მემარჯვენეებს“ კუთვნილ საარჩევნო ნომერს ართმევს- მამუკა კაციტაძე

პოლიტიკა - 15:42, 24 Aug, 2016

2199

„ახალი მემარჯვენეების“ თავმჯდომარე მამუკა კაციტაძე აცხადებს, რომ ცესკო პარტიას საარჩევნო ნომერს ართმევს.

„წინასაარჩევნო კამპანია აქტიურ ფაზაშია შესული და უსამართლო გადაწყვეტილებების საფრთხე და საშიშროება კვლავ აქტუალურია“. სწორედ ამ საფრთხეებზე ისაუბრა „ახალი მემარჯვენეების“ თავმჯდომარემ, მამუკა კაციტაძემ დღევანდელ ბრიფინგზე.

8 ოქტომბერს საპარლამენტო არჩევნებთან ერთად დაინიშნა ადგილობრივი თვითმმართველობის რიგგარეშე შუალედური არჩევნები. ამ არჩევნებში მონაწილეობის სურვილით, 21 აგვისტოს „ახალმა მემარჯვენეებმა“ კანონის თანახმად შესაბამისი წერილით მიმართა ცესკოს.

ასევე კანონის თანახმად, პარტიამ 22 აგვისტოს მიმართა ცესკოს, რომ მისთვის მინიჭებული უფლების ფარგლებში, ისარგებლოს კონკრეტული რიგირთი საარჩევნო ნომრით, რომელიც მინიჭებული ჰქონდა 2014 წლის ადგილობრივი თვითმმართველობის არჩევნებზე, როდესაც „ახალი მემარჯვენეები“ მონაწილეობდა ბლოკის სახით „არასაპარლამენტო ოპოზიცია“ და ბლოკში პარტია სუბიექტთა ჩამონათვალში იყო პირველი. შესაბამისად „ახალი მემარჯვენეები“ გამოთქვამს სურვილს, ისარგებლოს იმ რიგირთი ნომრით, რომელიც ჰქონდა 2014 წლის ადგილობრივი თვითმმართველობის არჩევნებში.

ამის პრეცედენტი იყო 2015 და 2016 წლის მაისში ჩატარებული შუალედური არჩევნები, რომელშიც ბლოკის „არასაპარლამენტო ოპოზიცია“ სუბიექტმა გამოიყენა მისთვის 2014 წელს მინჭებული რიგითი საარჩევნო ნომერი.

„ახალი მემარჯვენეების“ თავმჯდომარე მიმართავს ცენტრალურ საარჩევნო კომისიას, არ გაიმეოროს წინამორბედის ქმედება, როცა 2012 წლის არჩევნებში პარტიას „კონსერვატორები“ ჩამოართვა მისი კანონით განსაზღვრული ნომერი.

აქვე უნდა აღინიშნოს, რომ 2016 წლის 8 ოქტომბერს, ტარდება საპარლამენტო არჩევნები, რომელში მონაწილეობასაც, ისევე, როგორც ადგილობრივი თვითმმართველობის შუალედურ არჩევნებში, გეგმავს „ახალი მემარჯვენეები“. შესაბამისად, გაუგებარია, როგორ აწარმოოს პარტიამ 2 საარჩევნო ნომრით საარჩევნო კამპანია ერთსა და იმავე ოლქში.

ეს პრობლემა ეხება ადგილობრივი თვითთმართველობის შუალედურ არჩევნებში მონაწილე ორ პარტიას „ახალ მემარჯვენეებს“ და „პატრიოტთა ალიანსს“.

როგორც მამუკა კაციტაძემ განაცხადა, „ჩნდება საფრთხე, რომ დღეს 24 აგვისტოს ცესკომ „ახალ მემარჯვენეებს“ ჩამოართვას მისი კუთვნილი საარჩევნო ნომერი. მოვუწოდებ ცენტრალურ საარჩევნო კომისიას, დაუშვებელია სარჩევნო გარემოსთან დაკავშირებულ არაერთ პრობლემას დაემატოს კიდევ ერთი, რაც პოლიტიკური პარტიისთვს მისი კუთვნილი, სამართლებრივად მინიჭებული უფლების ჩამორთმევაში გამოიხატება.

მოვუწოდებ ხელისუფლებას, არ გაიმეოროს წინამორბედის, 2012 წლის ქმედება, რადგან ეს სრულად იქნება მისი პასუხისმგებლობა.

და მოვუწოდებ სადამკვირვებლო ორგანიზაციებს, არ დაუშვან ზემოთხსენებული პოლიტიკური პარტიებისთვის საარჩევნო მდგომარეობის გაუარესება.“ - განაცხადა კაციტაძემ.