ბურჭულაძე სუს-ის მიერ ზეწოლის შესახებ ვიდეოჩანაწერების გამოქვეყნებას გეგმავს

პოლიტიკა - 23:17, 23 Aug, 2016

2188

მოძრაობა სახელმწიფო ხალხისათვის ლიდერის პაატა ბურჭულაძის თქმით მის პარტიას აქვს მტკიცებულებები ზეწოლასთან დაკავშირებით და თუ სუს-ი ისევ იგივე რეჟიმში გააგრძელებს ქმედებებს, ამ მტკიცებულებებს გამოაქვეყნებს. მისი თქმით არსებობს ვიდეოფირები სადაც სუს-ის მიერ დაშინებული მისი თანაპარტიელები განვითარებულ მოვლენებს ყვებიან.

ბურჭულაძე ამბობს, რომ ჯერ ამ ფირების გასაჯაროებისგან თავს იკავებს და აცხადებს, რომ ჯერ კიდევ სამართლიანი სასამართლოს იმედი არ აქვს. როგორც პაატა ბურჭულაძემ აღნიშნა სუს-ის თანამშრომლები მისი თანამოაზრეების მიმართ ზეწოლას ყველა რეგიონში ახდენენ.

"ჩვენი გუნდის კიდევ ერთი წევრი გვირეკავს, რომ მესამე დღეა მასზე არის ზეწოლა. ისინი ითხოვენ მისგან და სხვებისგან, რომ თქვი რომ მიდიხარ პარტიიდან იმიტომ რომ ესენი არიან ნაციონალური მოძრაობისწევრები. ეს არის ქართული ოცნების მესიჯი, რომლითაც უნდათ რომ ჩვენ მოგვაყენონ ზიანი. ჩვენ როცა გვირეკავენ, ჩვენი მეგობრები, ისინი ამბობენ, რომ იძულებულები ვართ რომ გამოვიდეთ და ეს ვთქვათ. ჩვენ ვეუბნებით, რომ მოდით და ჩაგწერთ. ყველას გმირობას ვერ მოთხოვ, ოჯახები აქვთ. ამ ჩანაწერებს ჩვენ ვაგროვებთ. ამ გოგოს ვიდეო ჩვენ გვაქვს. თუ ასე გაგრძელდა ჩვენ ამას დავაგროვებთ და ერთად გავავრცელებთ. გვაქვს ვიდეოები სხვადასხვა რაიონებიდან. ეს ადამიანები ჩამოდიან და წერენ ამ ვიდეოებს. ეს არის კონსტიტუციური უფლების წართმევა, ეს ადამიანები გმირები არიან. ამას აკეთებენ სუს-ის თანამშრომლები. სუსი ჩვენ უნდა გვებრძოდეს და ტელევიზიით რუსი აგენტები უნდა გამოდიოდნენ? ეს არის სამართლიანობა? მე კიდევ იმედი მაქვს რომ თავს დაგვანებებენ. მე არ მაქვს იმედი, რომ სასამართლოში რომ მივალ და იქ მურუსიძე დამხვდება რას იზამს. ჩვენ ეს ვიდეოები გვაქვს და დაგვანებონ თავი, თორე ამ ვიდეოებს გამოვაქვეყნებ. მე მინდა, რომ ისინი გაჩერდნენ. თუ არ გაჩერდებიან ჩვენ ამას აუცილებლად გავაკეთებთ. დავით ჯანდიერია ჩემი იურისტი და ის მარწმუნებს, რომ ჯერ თავი უნდა შევიკავოთ,"- განაცხადა პაატა ბურჭულაძემ.