ირაკლი ჩიქოვანი ცესკო-ს მიმართავს, არ დაუშვან მოახლოებული საპარლამენტო არჩევნების გაყალბება

პოლიტიკა - 19:13, 22 Aug, 2016

1860

„ირაკლი ალასანია - თავისუფალი დემოკრატების“ მაჟორიტარი დეპუტატობის კანდიდატი პრემიერ-მინისტრს და ცენტრალურ საარჩევნო კომისიას მიმართავს არ დაუშვან მოახლოებული საპარლამენტო არჩევნების გაყალბება. ირაკლი ჩიქოვანმა მიმართვა ზუგდიდის სალოქო საარჩევნო კომისიის ოფისთან გააკეთა, სადაც დღეს ხმათა უმრავლესობით უნდა მოხდეს საუბნო საარჩევნო კომისიების დაკომპლექტება.

„ადგილობრივი ხელისუფლების წარმომადგენლები პირდაპირი კარნახის წესით მიუთითებენ, თუ ვინ აირჩიონ საუბნო საარჩევნო კომისიებში, როგორც ე.წ. პროფესიული წევრები. ეს არის მიუღებელი და ეს არის პირველი ნაბიჯი არჩევნების გაყალბებისკენ“, - განაცხადა ირაკლი ჩიქოვანმა.

მაჟორიტარობის კანდიდატმა მოუწოდა პრემიერ-მინისტრს დაინტერესდეს თუ როგორ მოქმედებენ მისი პარტიის წარმომადგენლები ადგილობრივ ორგანიზაციებში.

„მივმართავ ასევე საოლქო საარჩევნო კომისიის წევრებს, ნუ გახდებიან ნურცერთი მათგანი პოლიტიკური მანიპულირების საგანი. მათ უნდა მიიღონ დამოუკიდებელი გადაწყვეტილება“, - განაცხადა ირაკლი ჩიქოვანმა, რომელმაც ასევე აღნიშნა, რომ მისთვის უკვე ცნობილია საუბნო საარჩევნო კომისიების წევრების სია. მაჟორიტარი დეპუტატობის განდიდატმა ეს სია დღეს ზუგდიდის საოლქო საარჩევნო კომისიის კანცელარიაში შეიტანა.