უმრავლესობა ტერორიზში ბრალდებულის უკრაინასთან კავშირზე აკეთებს აქცენტს

პოლიტიკა - 17:34, 22 Aug, 2016

2713

ტერორისტული აქტის მომზადების გამო, სუს-ის კონტრდაზვერვის მიერ, 7-დ კაციანი ჯგუფის დაკავებას მმართველი გუნდი გამოეხმაურა. ისინი ყურადღებას ამ ჯგუფის ერთ-ერთი წევრის უკრაინასთან კავშირზე ამახვილებენ, თუმცა აცხადებენ, რომ გამოძიებამ დამატებითი მასალები უნდა მოიძიოს.

სესიაშვილის თქმით, ის პოლიტიკურ კორექტულობას ინარჩუნებს, თუმცა ხაზს უსვამს სუს-ის კარგ მუშაობას:

"ჩვენი ოპონენტები ხშირად საუბრობენ და ხშირად ახდენენ ამ ინსტიტუტების დისკრედიტაციას. ჩვენ კიდევ ერთხელ დავრწმუნდით, რომ ამ უწყების კარგმა მუშაობამ განაპირობა ასეთი ძალიან სახიფათო ტერორისტული აქტის აღკვეთა. გამოძიებას მოუწევს დამატებითი ინფორმაციის მოძიება, მათ შორის იყო საუბარი, რომ ერთ-ერთ ტერორისტს კავშირი ჰქონდა უკრაინასთან და ხშირად მიდიოდა-მოდიოდა. ვინარჩუნებ პოლიტიკურ კორექტულობას,"- განაცხადა სესიაშვილმა.

უკრაინასთან ერთ-ერთი დაკავებულის კავშირებზე ამახვილებს ყურადღებას გია ვოლსკიც:

"უკრაინაში მოძრაობდა ადამიანი, გიდასტურებენ, გეუბნებიან, რომ კი, ჰქონდა ურთიერთობა უკრაინასთან. ამასთანავე გამოვლენილია ძალიან მსხვილმასშტაბიანი ტერორისტული აქტის ჩატარების მცდელობა. ეს არის ფაქტი. ვის სად უნდა ყურადღების გადატანა, ეს მეორე საკითხია,"- აღნიშნა გია ვოლსკიმ.