"ქრონიკა+"-ის მთავარი რედაქტორის მიერ გავრცელებულ ინფორმაციას, რომლის მიხედვითაც პაატა ბურჭულაძე ე. წ. კანონიერი ქურდის ტარიელ ონიანის ახლო მეგობარი და შვილის ნათლიაა, პოლიტიკური პლატფორმა "პაატა ბურჭულაძე - სახელმწიფო ხალხისთვის" წევრები მათი გაერთიანების წინააღმდეგ მიმართულ კამპანიად აფასებენ.

როგორც გიორგი ვაშაძემ განაცხადა, არჩევნებში გამარჯვების შემთხვევაში, მათი გუნდი კანონიერი ქურდების წინააღმდეგ ბრძოლას გააგრძელებს. ფაქტი კი რომ ბურჭულაძემ 20 წლის წინ ტარიელ ონიანის შვილი მონათლა არაფერს ნიშნავს.

„20 წლის წინ ბავშვი მონათლე, ეს არაფერს ნიშნავს დღევანდელი მდგომარეობისთვის, ჩვენ შეურიგებელი ვიქნებით ქურდული სამყაროს მიმართ, ჩვენი გამარჯვების შემთხვევაში, რა თქმა უნდა, ქურდული სამყარო ვერასდროს საქართველოში ვერ დაბრუნდება. ყველაზე ნაკლები კონტაქტი ქურდულ სამყაროსთან ჩვენს პოლიტიკურ ძალას აქვს. სხვები ნამდვილად გამოირჩევიან ამ კუთხით, მათ შორის ქართული ოცნების წევრებიც"- განაცხადა გიორგი ვაშაძემ.

ზურაბ ჯაფარიძის თქმით, კი კადრების გავრცელების უკან ყოფილი და მოქმედი ხელისუფლება დგას.

"პაატა ბურჭულაძე არის ცნობილი ადამიანი, მას მონათლული ჰყავს ძალიან ბევრი ადამიანი, ამ ოცი წლის წინანდელი კადრების ამოღება და ფრიალი, გასაგებია ნებისმიერი საღად მოაზროვნე ადამიანისთვის, რომ არის ჩვეულებრივი ორკესტრირებული ქმედება, რომლის უკანაც დგანან პოლიტიკური ძალები. არ ვიცი ეს არის ნაციონალური მოძრაობა, ქართული ოცნება, მნიშვნელობა არ აქვს, მაგრამ ესენი არიან გაწაფული ასეთი ტალახის სროლაში და აგრძელებენ იმას, რაც იციან ყველაზე კარგად,“-განაცხადა ზურა ჯაფარიძემ.