,,ზუგდიდის საოლქო-საარჩევნო კომისიებში ხელისუფლების ზეგავლენის ქვეშ მყოფი პირები ინიშნებიან“

,,ზუგდიდის საოლქო-საარჩევნო კომისიებში ხელისუფლების ზეგავლენის ქვეშ მყოფი პირები ინიშნებიან“ - ირაკლი ჩიქოვანი

პოლიტიკა - 20:33, 21 Aug, 2016

2306

„ირაკლი ალასანია - თავისუფალი დემოკრატების“ ქალაქ ზუგდიდის მაჟორიტარი დეპუტატობის კანდიდატმა ირაკლი ჩიქოვანმა პარტიის ზუგდიდის ორგანიზაციის ოფისში საგანგებო ბრიფინგი გამართა.

დეპუტატობის კანდიდატის განცხადებით, ადგილობრივი ხელისუფლება აპირებს საოლქო-საარჩევნო კომისიებში დანიშნოს „ქართული ოცნების“ ზეგავლენის ქვეშ მყოფი პირები „პროფესიული წევრების“ კვოტით.

ირაკლი ჩიქოვანმა დღევანდელ ბრიფინგზე გაასაჯაროვა სია, რომელშიც რეკომენდატორებად მითითებულნი არიან გამგებლის წარმომადგენლები ადმინისტრაციულ ერთეულებში, ადგილობრივი თვითმმართველობის მოხელეები, მუნიციპალიტეტის კერძო სამართლის იურიდიული პირების ხელმძღვანელები, საკრებულოს მაჟორიტარი წევრები (ფრაქცია „ქართული ოცნება - დემოკრატიული საქართველო“ და შედგენის პროცესში აქტიურ მონაწილეობას იღებდნენ ქართული ოცნების ქალაქ ზუგდიდის მაჟორიტარი დეპუტატობის კანდიდატის მერაბ ქვარაიას საარჩევნო შტაბის ხელმძღვანელი გრიგოლ (გრიხა) მიქავა, რომელიც ჩიქოვანის განცხადებით, 2012 წლის არჩევნებზე ნაციონალური მოძრაობის, კერძოდ კი, პარტიის მაჟორიტარი დეპუტატობის კანდიდატის როლანდ ახალაიას შტაბის ერთ-ერთი ხელმძღვანელი იყო. ამასთან, ირაკლი ჩიქოვანის განცხადებით, საუბნო-საარჩევნო კომისიაში „ პროფესიული წევრების“ დანიშვნაში მონაწილეობას სუს -ის ადგილობრივი ხელმძღვანელი გოგი ნაჭყებიაც იღებს.

„თავისუფალი დემოკრატების“ ქალაქ ზუგდიდის მაჟორიტარი დეპუტატობის კანდიდატი მოუწოდებს არასამთავრბო ორგანიზაციებს დაინტერესდნენ აღნიშნული ფაქტით და მოახდინონ რეაგირება.