"წლების შემდეგ სიამაყით ვიტყვით, რომ ჩვენ მივიღეთ მნიშვნელოვანი გადაწყვეტილება"- ჯაფარიძე ბურჭულაძესთან გაერთიანებაზე

პოლიტიკა - 18:53, 18 Aug, 2016

2346

აპც „გირჩის“ ლიდერის ზურაბ ჯაფარიძის თქმით, პაატა ბურჭულაძის პარტიასთან გაერთიანება მნიშვნელოვანი პოლიტიკური პროცესია, რადგან მოხდა პროდასავლური კურსის მქონე პოლიტიკური ძალების გაერთიანება, რომლებსაც ასევე აერთიანებთ ეკონომიკის განვიტარების ერთნაირი ხედვა:

„ძალიან მნიშვნელოვანი დღეა. ჩემი სურვილი იყო, შექმნილიყო ახალი პროდასავლური პოლიტიკური ცენტრი, რომლის მიზანიც იქნებოდა საქართველოს სწრაფი ეკონომიკური განვითარება. საქართველოს აქვს გაცილებით დიდი პოტენციალი, ვიდრე დღეს ვაკეთებთ. მწამს და ძალიან მიხარია, რომ ჩემ კოლეგებს ჩემნაირი ხედვა აქვთ. ჩვენ გვაქვს თანხვედრა, რომ საქართველომ დასავლეთის მიმართულებით სვლა უნდა გააგრძელოს და მოხდეს ეკონომიკის სწრაფი ზრდა, რადგან ეს ყველა პრობლემის გასაღებია, იქნება ეს ტერიტორიული მთლიანობა, საგარეო საფრთხეებთან გამკლავება თუ სოციალური სიდუხჭირე. ეს იქნება ის პოლიტიკური გუნდი, რომელიც უზრუნველყოფს რომ საქართველოს ქონდეს პროდასავლური კურსი და გატარდეს, შესაძლოა მტკივნეული მაგრამ ძალიან საჭირო ეკონომიკური რეფორმები. მე მინდა და დარწმუნებული ვარ, რომ ბევრი წლების შემდეგ, როდესაც ამ დღეს გადმოვხედავთ, სიამაყით ვიტყვით, რომ ეს იყო ის დღე, როდესაც ჩვენ მივიღეთ მნიშვნელოვანი გადაწყვეტილება " - განაცხადა ზურაბ ჯაფარიძემ.

პაატა ბურჭულაძის „მოძრაობა სახელმწიფო ხალხისთვის“ და „ვაშაძე-ჯაფარიძე- ახალი არჩევანი“ ("გირჩი", "ახალი საქართველო", "ახალი მემარჯვენეები" ) გაერთიანდნენ. განცხადება ცოტა ხნის წინ პაატა ბურჭულაძის პარტიის ოფისში ლიდერებმა გააკეთეს.