პაატა ბურჭულაძის „მოძრაობა სახელმწიფო ხალხისთვის“ და "ვაშაძე-ჯაფარიძე-ახალი არჩევანი" გაერთიანდნენ

პოლიტიკა - 18:14, 18 Aug, 2016

5328

პაატა ბურჭულაძის „მოძრაობა სახელმწიფო ხალხისთვის“ და „ახალი არჩევანი“ გაერთიანდნენ. განცხადება ცოტა ხნის წინ პაატა ბურჭულაძის პარტიის ოფისში ლიდერებმა გააკეთეს. პაატა ბურჭულაძის თქმით გაერთიანება არ დასრულებულა და პროდასავლური ღირებულებების პოლიტიკური ძალებისთვის კარი ისევ ღიაა:

„დღეს შეიქმნა ახალი პლატორმა, რომლის სახელწოდებაც არის „პაატა ბურჭულაძე- მოძრაობა სახელმწიფო ხალხისათვის“ . მე დიდი მადლობა მინდა გადავუხადო ჩვენს ყოფილ კოლეგებს ახლა კი თანაგუნდელებს, რომლებიც შემოგვიერთდნენ სწორედ მაშინ, როდესაც ჩვენ გუნდზე მიმდინარეობდა ძალიან დიდი ზეწოლა და იყო დიდი წნეხი ჩვენზე. დღეიდან ეს ბატონიშვილები ჩვენთან ერთად გაინაწილებენ ამ წნეხს, რისთვისაც მათ დიდ მადლობას ვუხდი, ეს გმირობის ტოლფასია. ჩვენ იმედის თვალით შემოგვყურებს მთელი საქართველო, უფრო სწორად ის 80% საქართველოსი, რომელსაც უჭირს. ჩვენ ვიძლევით პირობას, რომ როგორც კი მოვალთ ხელისუფლებაში ჩვენ მათ ცხოვრებას შევცვლით საგრძნობლად უკეთესობისკებ, და ამას იგრძნობენ არა 4 წლის შემდეგ არამედ პირველივე თვეებში. ცოტა დრო დარჩა მოთმინებისთვის. მე ინდა კიდევ გამოვაცხადო, რომ ჩვენი კარები ღიაა ყველასათვის ვინც ჩვენ ხედვებს იზიარებს, ჩვენი ხედვებია პროდასავლური, ესაა ნატოში გაწევრიანება, ესაა სწრაფი ეკონომიკური გზა და რაც მთავარია სამართლიანი საქართველო. მე მინდა ჩვენს მომხრეებს ვუთხრა , ცოტა დრო დარჩა და ყველაფერი ძალიან კარგად იქნება“- განაცხადა პაატა ბურჭულაძემ.

გირჩმა, ახალმა საქართველომ და ახალმა მემარჯვენეებმა თანამშრომლობა პაატა ბურჭულაძეს გუშინ შესთავაზეს.