ცესკოს ინფორმაციით, საჯარო რეესტრის ვებ-გვერდზე 9 პარტიის ხელმძღვანელი პირის შესახებ ინფორმაცია არ არის

პოლიტიკა - 15:23, 18 Aug, 2016

2006

ცესკოს სპიკერის განცხადებით, ცენტრალურ საარჩევნო კომისიას რეგისტრაციის გავლის მიზნით, ვალერი კვარაცხელიამ 16 მაისს მიმართა და რეგისტრაცია გაიარა როგორც პოლიტიკურმა გაერთიანებამ- „ნეიტრალური საქართველო“.
ანა მიქელაძე აცხადებს, რომ თუ საჯარო რეესტრის მიერ დადასტურდება, რომ რომელიმე პარტიას არ ჰყავს იურიდიულად უფლებამოსილი ხელმძღვანელი პირი, ცესკო მათი რეგისტრაციის გაუქმებასთან დაკავშირებით იმსჯელებს.

„რაც შეეხება პარტიის თავმჯდომარეების უფლებამოსილების საკითხს, ამასთან დაკავშირებით ცესკომ გუშინ მიმართა პოლიტიკურ პარტიებს, ამ შემთხვევაში, როგორც ვალერი კვარაცხელიას, ასევე სხვა პოლიტიკურ პარტიებს, რომელთა ხელმძღვანელი პირის შესახებ ინფორმაცია არ არის მოცემული საჯარო რეესტრის ოფიციალურ ვებ-გვერდზე. ასეთი პარტია სულ 9 არის დაფიქსირებული. საჯარო რეესტრმა მხოლოდ „ცენტრისტებთან“ დაკავშირებით გააკეთა განცხადება, რომ მათ რეგისტრაციაში არ გაატარეს „ცენტრისტების“ ხელმძღვანელი პირი. რაც შეეხება სხვა პარტიების წარმომადგენლებს და უფლებამოსილ პირებს, ამასთან დაკავშირებით, თუკი საჯარო რეესტრის მიერ მოხდა დადასტურება, რომ პოლიტიკური პარტიის უფლებამოსილი პირის ხელმძღვანელობაზე არის უარი, ამ შემთხვევაში, ცესკო იმსჯელებს და მიიღებს შესაბამის გადაწყვეტილებას“, - განაცხადა ანა მიქელაძემ.
მისი თქმით, ცხრავე პარტია ცესკოში საარჩევნოდ რეგისტრაციაშია გატარებული.

„ერთიანი ნაციონალური მოძრაობის“ მედია მდივანი ირმა ნადირაშვილის განცხადებით, ვალერი კვარაცხელიას პარტია სოციალესტებს, ბედუკაძის პარტიის მსგავსად ოფიციალურად თავმჯდომარე არ ჰყავს და შესაბამის გრაფაში ჩანაწერი არ არსებობს.
საჯარო რეესტრში ცენტრალური საარჩევნო კომისიის მიერ გაკეთებულ განცხადებასთან დაკავშირებით კომენტარი ჯერ არ გეკეთებულა.