"ჩვენ ვეძებთ გადაკვეთის წერტილებს და არა განსხვავებებს"- ჯაფარიძე ბურჭულაძესთან შესაძლო გაერთიანებაზე

პოლიტიკა - 12:37, 18 Aug, 2016

1452

ახალი პოლიტიკური ცენტრის „გირჩის“ ლიდერმა ზურაბ ჯაფარიძემ პაატა ბურჭულაძესტან შეხვედრის დაწყებამდე, იმ მიზეზებზე ისაუბრა, რის გამოც გიორგი ვაშაძის პარტიასთან და „ახალ მემარჯვენეებთან“ ერთად პაატა ბურჭულაძის მოძრაობასთან გაერთიანების იდეა გაჩნდა.

„ეს არ იქნება გაერთიანება არავის წინააღმდეგ, ეს იქნება კონკრეტული ხედვების გარშემო გაერთიანება. პირველ რიგში ეს არის ის რომ საქართველომ უნდა გააგრძელოს გზა ევროპისკენ და ნატოსკენ და მეორე ეს არის რომ საქართველოში უნდა მოხდეს სწრაფი ეკონომიკური განვითარება, რომ დავძლიოთ ის მთავარი პრობლემა, რომელიც საქართველოში უკვე მეოთხედი საუკუნეა რაც არის, ეს არის სიღარიბე. ეს არის ორი საკითხი რაზეც ჩვენ ვაპირებთ თანამშრომლობას. ცხადია იქნება საკითხები, რომელზეც ჩვენ გვექნება განსხვავებული ხედვები,მაგრამ ჩვენ ვთვლით , რომ პრინციპულად მნიშვნელოვანია, რომ პროდასავლური ძალების გაერთიანება მოხდეს. ჩვენ ვეძებთ გადაკვეთის წერტილებს და არა განსხვავებებს.“- განაცხადა ზურაბ ჯაფარიძემ.

ჯაფარიძე მოსალოდნელი გაერთიანებასთან დაკავშირებით მმართველი გუნდის მხრიდან გაკეთებულ განცხადებებსაც გამოეხმაურა და აღნიშნა, რომ მმართველი გუნდი ურეიტინგობის გამო შეშინებულია:

„მმართველი გუნდი არის შეშინებული, იმიტომ რომ მათი რეიტინგი არის დაბალი და მე ვერ ვხედავ შანსს, რომ ეს რეიტინგი აწიონ და მესმის რომ ამ შიშის და პანიკის გამო რაღაც განცხადებებს გააკეთებენ“- აღნიშნა ჯაფარიძემ.