მერიასთან ხეების მოჭრას აპროტესტებენ - მოქალაქეებმა ნარმანიას გადადგომა მოითხოვეს

პოლიტიკა - 19:05, 17 Aug, 2016

2146

ამ წუთებში „პარტიზანი მებაღეები“ თბილისის მერიასთან აქციას მართავენ.
„პარტიზანი მებაღეების" აქციას ყაზბეგის ქუჩაზე მცხოვრები მოქალაქეებიც შეუერთდნენ.
აქციის მონაწილეები ყაზბეგის ქუჩაზე ხეების მოჭრას აპროტესტებენ.

მოქალაქეები დავით ნარმანიას გადადგომას ითხოვენ.

ორგანიზაციის ერთ-ერთმა წევრმა, ნატა ფერაძემ შიმშილობაც დაიწყო.

აქციას შეუერთდა საკრებულოს დამოუკიდებელი დეპუტატი, ალეკო ელისაშვილი. მან გამწვანების სამსახურის უფროსის გადადგომა და იმ ექსპერტის პასუხისმგებლობის დაყენება მოითხოვა, რომელმაც ხეების მოჭრის შესახებ დადებითი რეკომენდაცია გასცა.

”ეს არ არის პირველი შემთხვევა, როდესაც თბილისის მერია უკანონოდ გასცემს ბრძანებას ხეების მოჭრასთან დაკავშირებით. ჩვენი არაერთი მცდელობის მიუხედავად, მათ ამ დრომდე რეაგირება არ მოუხდენიათ აქციები გაგრძელდება. ჩვენი აქციის ერთ-ერთი მონაწილე შიმშილობს და ეს შიმშილობა გაგრძელდება მანამ, სანამ შესაბამისი პასუხისმგებელი პირები არ გათავისუფლდებიან დაკავებული თანამდებობებიდან"- აცხადებენ აქციის მონაწილეები.

”სანამ ეს სამსახური არ დაკომპლექტდება კვალიფიციური, პასუხისმგებლობით სავსე კადრებით, მე აქედან ფეხს არ მოვიცვლი. ვაცხადებ უვადო შიმშილობას” - განაცხადა ნატა ფერაძემ.

მისი თქმით, ყაზბეგის 24 ნომერში, საღი ხეები, მათ შორის იშვიათი ჯიშის ვერცხლისფერი ნაძვები გაჩეხეს.

მისივე ინფორმაციით, ყოფილი სისხლის გადასხმის ინტიტუტის ტერიტორიაზე ორი მრავალსართულიანი კორპუსის მშენებლობა იგეგმება.